Финската премиерка, Сана Марин, порача дека Финска во блиска иднина нема планови да се приклучи кон НАТО, но е подготвена да ги поддржи европските сојузници и САД во воведувањето строги санкции кон Русија доколку се случи напад врз Украина.

Тоа би имало многу значаен ефект и санкциите би биле исклучително остри – изјави Марин во интервју за Ројтерс.

Таа истакна дека е „многу неверојатно“ нејзината земја да се пријави за членство во НАТО во време на нејзиниот мандат.

Финска и Русија имаат заедничка граница долга 1.340 километри.

Американскиот претседател Џо Бајден пред два дена го повика финскиот претседател Саули Ниинисто, втор пат овој месец, да разговараат за „важноста на блиското одбранбено партнерство на Финска со САД и НАТО“, се наведува во соопштението од канцеларијата на Бајден.

Марин не сакаше да зборува за тоа, но кажа дека верува оти другите земји се свесни за фактот дека Финска долго одржувала „функционални“ односи со Русија.

Премиерката повтори дека Финска има право, доколку така одлучи, еден ден да се приклучи кон НАТО.

Никој не може да влијае врз нас, ниту САД, ниту Русија, ниту кој било друг – додава Марин.

Финска во декември одлучи да купи авиони Ф-35 и да купи воена опрема компатибилна со стандардите на НАТО.

Последната анкета на најголемиот фински дневен весник „Хелсингин саномат“ покажува дека 28 отсто од Финците сакаат земја во НАТО, додека 42 отсто се против.

Генерално, верувам дека ќе има повеќе дискусии за НАТО во наредните години – вели Марин.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.