Британскиот премиер Борис Џонсон денеска призна дека постои „реална можност“ руските сили да победат во нивната инвазија на Украина, јави Скај Њуз.

На прашањето дали се согласува со проценките на британското разузнавање дека Русија би можела да победи во војната во Украина, тој пред новинарите во Њу Делхи изјави: Тажното е што ова е реална можност.

Путин има огромна војска, но, тој има многу тешка политичка позиција бидејќи направи катастрофална грешка. Единствената опција што сега ја има е да продолжи да се обидува да го користи својот ужасен пристап за „мелење“, предводен од артилерија, за да се обиде да ги сотре Украинците.

Џонсон уште истакна дека верува во проценките на британското разузнавање дека војната би можела да трае до крајот на 2023 година.

Тој е многу блиску до обезбедување копнен мост во Мариупол сега. Се плашам дека ситуацијата е непредвидлива во оваа фаза. Мораме да бидеме реални за тоа, посочи Џонсон.

Говорејќи за време на прес-конференцијата во Њу Делхи, Џонсон истакна дека Украинците покажале „неверојатен хероизам“ во војната и „без разлика каква воена супериорност“ има Путин, тој нема да може „да го победи духот“ на украинскиот народ.

Џонсон, исто така, рече дека Велика Британија ќе испрати повеќе артилерија до украинските сили и потврди дека британската амбасада ќе биде повторно отворена во главниот град на Украина следниот месец.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.