Четири лица се убиени, а други четири се повредени во престрелка во Филаделфија. Напаѓачот е уапсен, објавија синоќа локалните медиуми, повикувајќи се на полицијата.

Портпаролот на полицискиот оддел во Филаделфија изјави дека има „повеќе жртви од огнено оружје“, но рече дека во овој момент нема дополнителни детали.

Синоќа пред 21 часот, 10 минути откако одекнаа истрели во градот, полицијата извести за апсење на осомничен маж кој носел балистички елек, додавајќи дека пронашла пушка и пиштол во блиската улица, пишува весникот „Филаделфија Инквајер“ („The Philadelphia Inquirer“).

Според извештаите на весникот и филијалата на филаделфиската телевизија WPVI, филијала на Еј-Би-Си Њуз (ABC News), двајца од застреланите биле малолетници, но не е јасно дали тие се меѓу загинатите.

Засега нема јасни детали за вооружениот напад. Медиумите јавија дека пукањето се случило во југозападниот дел на Филаделфија, во Кингсешинг.

Престрелката се случи еден ден откако две лица беа убиени, а 28 повредени за време на забава во соседството во Балтимор, Мериленд. Полицијата соопшти дека се уште трага по повеќе осомничени за пукањето.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.