Утре јавен превоз во Скопје ќе нема од 4.30 часот. Вработените и денеска не добија плата, а како што рекоа од синдикатите на јавното претпријатие кои присуствуваа на вонредната седница на Советот на Град Скопје, советниците и градоначалничката си тераат политика, а не разговараат за нивниот проблем.

„Вие може политика да терате до сабајле, но сабајле автобуси нема да има. Вам не ви е гајле, вие не се возите со јавен превоз. Овие луѓе имаат деца, гладни се, немаат пари да им дадат за ужинка на училиште. Овде не видовме никој да каже како ќе се реши проблемот и ќе добиеме плата туку нивни партиски и политички препукувања“, рекоа од синдикатите.

Советниците и градоначалничката се расправаа за „шпицниот градоначалник“, за тоа кој сакал кола и службен телефон, а ништо за тоа како суштински да се реши проблемот и како ќе се најдат пари.

Вонредната седница на Советот се одржува на барање на советничката група на ВМРО-ДПМНЕ која предлага да се пренаменат средства од буџетот за плати за вработените во ЈСП „Скопје“, а од синдикатот на вработените во ЈСП се надеваат дека на оваа седница ќе се најде решение за исплата на нивните плати.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.