Како што најавив, на денешната прес-конференција јавно и транспарентно ќе споделам дел од наодите кои се констатирани во Извештајот на Работната група за вршење на увид во документацијата од постапката на преземање на документацијата од град Скопје за објектот Универзална сала во Министерството за култура и туризам, рече денеска министерот за култура и тузирам, Зоран Љутков.

По темелно и стручно прегледување на целокупната документација, процес кој траеше два месеци, Извештајот е готов и фактите потврдени од професионалци и искусни правници, вработени во Министерството за култура и туризам, говорат дека Универзална сала е преземена од град Скопје во Министерството за култура и туризам на незаконски начин, во постапка која е проблематична, со прекршувања на повеќе закони.
Моја должност е да го исправиме сето ова, за да можеме да продолжиме, во интерес на еден толку значаен објект како што е Универзална сала,а во интерес на граѓаните на нашата држава.
Сега ќе се осврнам на дел од наодите од Извештајот на работната група, кои се однесуваат што сме затекнале, каков процес сме затекнале, кои се последиците од таквото незаконско преземање и кои ќе бидат брзите чекори за повторно ставање во функција и отпочнување со градење на Универзална сала.
Констатирани се бројни прекршувања на позитивните законски прописи и во постапката за преземање на реконструкцијата на Универзална сала и во постапките на спроведување на јавните набавки.
• Постапката е започната со Одлуката на Град Скопје како постапка за промена на инвеститор согласно член 70 од Законот за градењето.ж
• Склучениот договор од страна на Министерство за култура и Град Скопје, содржи контрадикторни одредби, не е заверен на нотар, не содржи таксативно кои права и обврски се предаваат и што всушност се предава.
• Исто така Договорот помеѓу Градот Скопје и Министерствоот за култура, како и Решението за реконструкција од 22.03.2024 година издадено од општина Центар, не се запишани во Катастарот на недвижности, односно во јавната книга во која се врши запишување на правото на сопственост и на други стварни права на недвижностите.
• Постапката понатака продолжува како промена на инвеститор но со низа недостатоци и со недефинирани преземени права и обврски, и продолжува со поднесување на барање за реконструкција (а не со барање за промена на инвеститор како што предвиува законот и постаппката во електронскиот систем за е-градежна дозвола). Постапката завршува со издавање на Решение за реконструкција каде како соинвеститори се наведени Град Скопје и Министерството за култура.
• Во оваа постапка преземена е проектна документација директно од правно лице за проектирање, а не од претходниот инвеститор односно од Градот Скопје како што налага Законот за градење. Ниту во Договорот ниту во Записникот од примопредавањето на документација помеѓу Град Скопје и Министерството за култура, не е опфатена ниту примопредадена целокупната документација која била потребна за да се продолжи со реконструкцијата на Универзална сала.
• Не е донесена одлука за престанок и за давање на користење на недвишната ствар – објектот на Универзална сала.
• Согласно ова, на Министерството за култура не му биле пренесени во целост правата и обврските согласно закон (за втора фаза од реконструкцијата).
• Министерството за култура и туризам условно исполнил само еден од двата кумулативни законски услови предвидени во член 70 од Законот за градење, за да може да се стекне со статус на инвеститор, а тоа е: со склучување на посебен договор помеѓу претходниот и новиот инвеститор, да ги преземе правата и обврските кои претходниот инвеститор ги имал со учесниците во градењето, додека не го исполнил и вториот законски услов, а тоа е да биде носител на правото на градење.
• Постапките по јавни набавки кои се распишани и спроведени во меѓувреме од страна на поранешното раководство на Министерството за култура и туризам, а се однесуваат за објектот на Универзална сала Скопје, имајќи ги во предвид констатираните недостатоци и пропусти во постапката Министерството за култура да има статус на инвеститор на реконструкцијата, се поништени.
Почитувани новинари,
Ова е накусо состојбата која ја затекнавме. Веднаш по моето стапување на должност министер за култура и туризам, на 3 јули годинава поднесовме барање до Државниот завод за ревизија за спроведување на постапка на ревизија над постапката на превземање на реконструкцијата за објектот Универзална сала од Град Скопје во Министерството за култура и туризам, а на први август поднесовме и барање до Министерството за транспорт и врски како надлежен орган согласно Законот за градењето за вршење на управен надзор над постапката за издавање на решението за реконструкција донесено од Општина Центар.
Целокупната документација е предадена во Јавното обвинителство затоа сега нема многу да навлегуваме во детали се до произнесувањето на надлежните државни органи.
Исто така, во соработка со досегашните учесници во градбата (управител на градба, стручен надзор и со правен субјект за вештачење) во тек е подготовка на стручен извештај со податоци односно пресек на извршени и незавршени градежни работи на објектот, исплатени и неисплатени позиции од градежни работи по времени ситуации, (за градежни работи кои се пријавени и кои останале непријавени од претходен инвеститор и изведувач) како и од евентуална потреба од изведување на дополнителни и непредвидени градежни работи кои се предизвикани од немилиот настан (пожар) од првата фаза на објектот на Универзална сала во Скопје.
Со оглед на немилиот настан (пожар) констатирано е дека изработената техничка документација за реконструкција на Универзална сала се преиспитува дали постојната состојба има потреба од изработка на нова техничка документација.
Министерството за култура и туризам во меѓувреме достави до Владата на РСМ измени и дополнувања на постојниот Закон за културата со кои ќе се нормира надлежноста на МКТ да го врши правото на реконструкција и над објекти, кои се во општинска сопственост.
На крајот ќе потеницирам, Министерството за култура и туризам не е тука да руши или да ја одолговлекува изградбата на Универзална сала, или кој било друг објект.
Нашата цел е да биде изградена Универзалната сала, објект кој е во нашата меморија како граѓани, сцена каде сме виделе или се доживеале прекрасни културни настани.
Универзална сала ќе биде изградена, но исклучиво во постапка која е легална и која ги почитува сите законски норми, во интерес на македонските граѓани.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.