Град Скопје упати јавна покана до министерката за култура Бисера Костадиновска Стојчевска за присуство на отворена работна средба на која ќе ѝ се презентираат, како што велат, факти за грешките во проектот и техничката документација за текот на работите за реконструкција на Универзалната сала.

Од Министерството за култура вчера реагираа дека Универзалната сала мора да биде ставена во функција најбрзо што може и во таа смисла недозволиво е со месеци ништо да не се презема, но од Градот ѝ порачаа дека министерката како застапник на овој спорен проект за реконструкција на Универзална сала веројатно не е информирана и воопшто нема познавања за состојбите.

Доколку по средбата сè уште смета дека стариот проект може да продолжи, да потпише изјава со која лично ќе гарантира за исправноста на постоечкиот проект за реконструкција на Универзалната сала и за безбедноста на скопјани. Врз основа на направениот увид во сите записници и техничка документација, составувани уште во време на владеењето на СДСМ со Град Скопје, утврдени се сериозни грешки и недостатоци во проектот за реконструкција на Универзална Сала со импликации по безбедноста на објектот, но пред се, загрозувајќи ја безбедноста на граѓаните. Тоа се записници од луѓе кои раководеле со Градот во време на владеење на СДСМ и Шилегов, потенцираат од Град Скопје.

Велат, политички е крајно неодговорно од власта да се пласираат дезинформации, знаејќи дека нивните кадри носеле одлуки и отпочнувале половични проекти со сериозни недостатоци кои значат опасност по безбедноста на граѓаните.

За ова говорат и сите официјални извештаи кои биле донесени токму во мандатот на претходното раководство на Град Скопје, додека се извршувале градежни активности за реконструкција на Универзална сала под сомнителни и небезбедни околности. Упатуваме апел до централната власт и СДСМ да се стави крај на овие политички препукувања и секојдневни напади кон Град Скопје и градската администрација со цел собирање политички поени, а на штета на граѓаните. Граѓаните бараат работа, посветеност и град кој ќе биде во служба на решавање на нивните проблеми и токму тоа е она на кое што оваа градска администрација посветено ќе работи во овој четиригодишен мандат. А безбедноста на граѓаните е пред сè, се вели во реакцијата од Град Скопје.

Додаваат дека враќање во функција на Универзална сала како значајно обележје за Скопје и скопјани беше едно од ветувањата и е дел од програмските активности на новото градско раководство и истото ќе биде реализирано, но со максимална заштита на интересот и безбедноста за граѓаните.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.