За изборите догодина со Предлог-буџетот за 2024-та се предвидени една милијарда денари или за секој циклус по 500 милиони денари, рече денеска министерот за финансии Фатмир Бесими.

Според него, планираните капитални инвестиции за време на изборите не смеат да се промовираат, но нивната реализација нема да се стопира.

-Јасно е во Законот за спречување на корупција дека за време на избори, тоа што е проектирано не се прекинува, туку за не може да се промовира. Не може да се промовира или да се почне со нови проекти кои може да влијаат врз изборниот циклус. Така да, овие проекти што се проектирани може да се реализираат во текот на наредната година, затоа што се работи за дел од нив што се тековни проекти. Планираните 733 милиони евра за капитални инвестиции во 2024 година се проекции за проекти што се во тек, за нивна реализација, чија реализација доспева во текот на наредната година според првичните планирања на ресорните министерства. Нивното финансирање, дел е од буџетот, дел е од меѓународните финансиски институции. И токму од оваа претпоставка, според проекциите и дискусиите на ресорните министерства, ние ги имаме дефинирано овие за наредната година и веќе оваа година, ако гледаме реализација и назад во претходните години, имаме постојана реализација на повисоко ниво на капитални инвестиции во однос на претходните години, објасни Бесими, одговорајќи на новинарски прашања, откако претходно ги образложи буџетските ставки за 2024 година во Предлогот што го усвои Владата.

Според министерот, од 2021-ва наваму, земјава секоја година бележи раст не само на проектирани, туку и на реализирани инвестиции.

-Во однос на Буџетот или во однос на БДП ако ги гледаме капиталните инвестиции, од 2020 година кога беа 2,4 или 2018 или 17, кога тие беа на пример, 1,8 , 18, 3,2, 17 година и 20 се на 2,4. Ние од 2021-ва натака имаме секоја година раст на реализирани, не само проектирани, на капиталните расходи, 3,2 имаме во 2021, 3,6 имаме во 2022 и сега проектираме на 4,6 од БДП, реализација на планирани капитални расходи или гледано номинално, ако капиталните расходи во 2018 година биле на 12,1 милијарда денари, сега зборуваме за проектирани 45 милијарди денари. Значи неколкукратно повеќе инвестиции, а и во текот на 202 година имаме 28,7 милијарди капитални реализирани, а во текот на оваа година имаме реализирано до сега 59 отсто од планот. Во однос на 2022 година, јануари и ноември, во капиталните расходи имаме за 95 отсто повисоки. Значи, скоро двојно повеќе во однос на минатата година реализација на капиталните расходи. Ако сме имале реализација на капиталните лани 16 милијарди денари заклучно со ноември, сега имаме 31,3 милијарди денари во овој ист период. Скоро дупло повеќе капитални расходи во однос на тоа што било минатата година, истакна Бесими.

Тој информира и дека годинава досега се реализирани 69 отсто од планираните средства за капитални инвестиции.

Бесими информира дека на владина седница поминаа два закона за задолжување кај ЕИБ и ЕБОР за железничкиот Коридор 8.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.