Три дена изнесуваме сомнежи за местење на тендер во висина од 22 милиони евра за надзор врз изградбата на Коридорите 8 и 10д, три дена медиуми изнесуваат информации, а ЈО молчи, и токму затоа е ниска довербата во правосудството, зошто истото има потреба со денови да чека кога станува збор за сомнежи за криминал во власта, бара Бојан Стојановски од ВМРО-ДПМНЕ.

Имаме две ситуации, кои индицираат на нерегуларности при изборот на шпанската фирма ЕПТИСА за надзорот вреден 22 милиони евра, само тие се доволни за ЈО да отвори постапка, а тоа се:

1. Владата на 30.09.2020 година носи Одлука со која им препорачува на сите институции да не склучуваат договори со ЕПТИСА, затоа што истата работела несоодветно, незаконски и неетички, на железничката пруга Куманово – Бељаковце, една година подоцна Министерството за транспорт и врски носи Потврда со која и издава дозвола ЕПТИСА да може да врши надзор за истите работи за кои веќе еднаш на владина седница е констатирано дека истата работела незаконски, неетички и несоодветно.

ЈО мора да истражи, зошто ЕПТИСА првин била санкционирана, за по една година да добие повторно дозвола? Што се крие зад магично брзото помилување?

2. Власта во тек на јавниот повик за избор на надзор, го менува огласот во два дела, првин го продолжува рокот за поднесување пријави, но и го брише условот само фирми со позитивни биланси од последните 3 години да можат да учествуваат на истиот. Со оваа одлука власта дозволува фирми загубари да се јават и добијат тендер вреден 22 милиони евра. Таква фирма загубар е и ЕПТИСА, која во билансите од 2019, 2020 и 2021 година прикажува милионско загуби.

Поради итноста на постапката, имајќи во предвид дека отпочнувањето на работата на автопатите треба да започне брзо, го повикуваме ЈО да не чека и итно да отвори постапка која ќе го расветли случајот.

Ненавремена реакција на ЈО може да значи штета по државата подоцна во процесот, таа штета ќе оди на вина на ЈО, затоа потребна е итна реакција.

Очекуваме ЈО да отвори истрага и да побара од судот времено запирање на постапката се до крајно расветлување на процесот.

Дали тендерските услови за коридорите 8 и 10, се менувани токму за ЕПТИСА, од страна на Ковачевски и Груби?



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.