Денеска се навршуваат седум години од оружената престрелка во кумановско „Диво Насеље“ во која загинаа осум припадници на безбедносните сили.

Тоа утро на 9 мај 2015 година, никој од кумановци нема да го заборави, секој со својата приказна. Пукотниците се слушаа од раните утрински часови, во тој дел од Куманово се гледаше густ црн чад. Дел од „Трета МУБ“ целосно беше затворен за сообраќај. Жителите кои живеат накај „Тоде Мендол“ раскажуваа дека почнала војна. Хеликоптери го надлетуваа Куманово, работници не можеа да отидат на работни места. Градот занеме. Овој трагичен настан во кој животите ги загубија осум припадници на македонските безбедносни сили ги длабоко ги вознемири кумановци. Граѓаните и наредниот ден слушаа рафали, се гледаше црн чад. Престрелките со различен интензитет траеја 28 часа.

Во оружената престрелка животот го загубија 8 припадници на полициските сили,   Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ, кои посмртно се одликувани со медали за храброст.

Беа убиени и 10 припадници на вооружената терористичка група.

Два дена градот живееше во неизвесност и страв. Исклучително трагичниот настан засекогаш ќе остане во сеќавање на кумановци.

За настаните во „Диво насеље“ од февруари 2016 година во Кривичниот суд се водеше судско рочиште против 29 лица кои се товарат за сторени кривични дела „Терористичка организација” и „Тероризам”. Сите 29 обвинети за кумановските случувања пред Судот се изјаснија дека не се чувствуваат виновни.

Случајот подоцна се спои со „Молња“ во кој се водеше постапка против осум лица помагачи на вооружената група од „Диво насеље“, со што бројот на обвинети се зголеми на вкупно 37.

Од 37 обвинети за тероризам и терористичка организација, 33 лица беа осудени за делата, а за четири лица е донесена ослободителна пресуда.

Кривичниот суд во ноември 2017 година на казна доживотен затвор осуди осуммина обвинети за терористичкиот напад во кумановско „Диво насеље“, а 13 обвинети добија казна од 40 години затвор.

На казна затвор од 20 години се осудени петмина обвинети, две години помалку доби еден обвинет, а по двајца обвинети добија казна затвор од 14, 13 и 12 години.

Пресудите подоцна ги потврди и Апелацискиот суд во Скопје.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.