Предлогот кој владата на Ковачевски го прифаќа е неприфатлив за Македонија, рече Драган Ковачки, пратеник и член на ИК на ВМРО-ДПМНЕ пред граѓаните кои денеска од 12 часот се собраа пред Влада, за да кажат „не“ за францускиот предлог. Ковачки порача дека народот, интелектуалците, општествените чинители и експертската јавност гласно кажуваат дека овој предлог за почеток на преговори е штетен за Македонија и води кон две сценарија, кое од кое полошо за државата, едното е вечно преговарање, а второто е асимилација по диктат на Бугарија.

Овој предлог преставува ултиматум кој во себе ги содржи сите бугарски барања. Тоа кое што владата се обидува да го протне како голем успех, е всушност голема дипломатска катастрофа. Рамката во себе содржи Протоколи или ако сакате Годишни извештаи преку кои Бугарија ќе има директно влијание и учество во менувањето на учебници, споменици, ќе влијае кон менување на историски факти за настани и ликови кои директно задираат на само во македонската историја, туку и во македонскиот идентитет.

Ова се понижувачки и недостоинствени позиции за Македонија. Друг да диктира лекции во учебниците, друг да диктира измени на Устав, друг да диктира дали некоја критика е говор на омраза или не. Понижување и порази, рече Ковачки.

Ковачки вели дека очекуваат Владата да се вразуми.

Десетици илјади граѓани секој ден јасно и гласно кажуваат ултиматум, Не благодарам. Владата треба да го послуша гласот на народот, а не да идо спротивно на неговата волја. ВМРО-ДПМНЕ стои зад овој став на граѓаните и затоа бара Ковачевски да ги прифати четирите суштински измени на Предлогот, да прифати широка дебата преку работни групи во кои ќе се слушнат сите мислења и да се изгради заеднички национален став, рече тој.

ВМРО-ДПМНЕ повторно повикува граѓаните и денес во 19 часот мирно, достоинствено и масовно да го искажат својот глас против ултиматумот.

Во 19 часот ќе се собереме пред Владата и ќе маршираме кон Министерството за надворешни работи, институцијата која е одговорна за овој дипломатски пораз, а потоа ќе се упатиме до пред Собранието на Република Македонија каде ќе го изразиме уште еднаш нашиот став против.

Народот кажа Ултиматум, не благодарам. Ковачевски и Владата треба да кажат дали стојат со или против својот Народ, вели Ковачки.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.