Во понеделник ќе продолжи седницата на собраниската Комисија за одбрана и безбедност на која на дневен ред се предлог-одлуките за одобрување на продолжување на рокот за постоење на кризна состојба на целата територија на државата, заради недостиг на електрична енергија и состојбите на пазарите на електрична енергија и за постоење на кризна состојба на подрачјето на Град Скопје, заради недостиг на топлинска енергија, можноста за користење на алтернативно гориво и состојбите на пазарот на топлинска енергија.

Енергетската криза се трансформира во економска и финансиска криза. Струја може да купиме, но по која цена. Мора да се фокусираме на помошта на стопанството. Енергетските постојки работат со пола капацитет бидејќи се потребни суровини, истакна пратеничката Лидија Петкоска.

Таа посочи дека ако повторно се прогласува енергетска кризна состојба мора да се види претходно каде биле потрошени парите.

Опозицијата уште еднаш го повтори барањето да се формира анкетна комисија за разгледување на енергетската криза.

Вицепремиерот за економски прашања Фатмир Битиќи, кој присуствуваше на седницата, претходно одговарајќи на тврдењата на опозицијата, меѓу другото, најави дека Владата во Собранието наскоро ќе претстави пакет антикризни мерки и законски измени.

Во однос на барањето за одговорност, Битиќи кажа дека 65.000 жители на Скопје ниту еден ден немале прекин на топлинска енергија, а за електричната енергија праша дали имало „еден ден, еден час, една минута“ недостаток на струја. На обвинувањата дека се склучат договори во четири очи, вицепремиерот повтори дека се што се работи е во рамки на законите.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.