Во Делчево се работи на асфалтирање на стариот локален пат Делчево – Тработивиште во должина од 5,3 километри. Kако што изјави министерот за транспорт и врски Благој Бочварски, кој изврши увид во градежните работи, изградбата на овој локален пат се реализира во рамки на „Проектот за поврзување локални патишта“, што Министерството го реализира со финансиска поддршка на Светска банка.

Во рамките на овој проект кој за Делчево донесе реализација на инфраструктурни проекти во висина од околу 800.000 евра, досега се изградени и реконструирани 6, 1 км локални улици и патишта, а во моментов се работи на реконструкција на дел од ул „Острец“ во должина од околу 50 м. каде се гради потпорен ѕид и тротоари и се проширува црната точка на главната сообраќајница во населбата Трети Реон – рече Бочварски.

Бочварски додаде дека министерството во континуитет продолжува со реализација на програмата за изградба на модерна патна инфраструктура, насекаде низ државава, а Проектот за рехабилитација на локални улици и патишта се реализира со силно темпо.

Навистина ме радува кога градоначалниците сериозно и посветено си ја вршат својата работа и ги користат сите услови да обезбедат нови инвестиции, да направат проект повеќе за својата општина и да им го подобрат животот на граѓаните. МТВ ппродолжува со поддршката за сите општини. И ги повикувам општините да изработуваат и доставуваат добри и квалитетни проекти со цел подобрување на квалитетот на животот на граѓаните и развој на локалните самоуправи –  рече Бочварски.

Патот е со ширина на коловозот од 4 метри, а поставени се и банкини и соодветна одводна инсталација.

Со реализацијата на овој проект се одговара на барањата и приоритетите на жителите од Разловци, Тработивиште и Делчево – нагласи градоначалникот на Општина Делчево, Горан Трајковски при увидот на завршните работи на локалниот пат.

Трајковски потенцираше дека се реализираат инфраструктурни проекти во Делчево.

Со задоволство можам да истакнам дека жителите на Тработивиште и Разловци, покрај регионалниот пат, досегашната единствена сообраќајна врска за овие села, добиваат уште една патна алтернатива која значи поблиску до Делчево и поблиску до земјоделското земјиште. Што значи дека не дозволуваме да се повтори сликата од пред 8-9 години, кога најоддалеченото село во делчевската општина, Разловци, остана подолг период без соодветна сообраќајна врска, поради пропаѓање на мостот на река Брегалница кај Тработивиште. Овој проект, покрај општествената одговорност, има за цел подобрување на пристапот на граѓаните до услугите и објектите од јавен интерес, како и зголемување на мобилноста и безбедноста во сообраќајот – нагласи Трајковски.

Тој најави дека се почнати процедурите за избор на компании за реконструкција на водоводната мрежа во Делчево во населбите: дел Милково Брдо, дел Ново Делчево, потисен цевковод до резервоарот Чука. Вредност на рпоектот е 23 милиони денари. Работите се очекува да почнат во средината на месец јули оваа година.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.