И се обраќам на македонската влада, се обраќам на Министерството за култура и на министерката Бисера Костадиновска – Стојческа, Ви се обраќам вам почитувани медиуми, во врска со Одлуката – Здружението на џез музичари на Македонија сега Национален оркестар за џез музика, да биде сместен во овој објект и две институции да функционираат заедно под еден покрив, го почна денеска своето обраќање директорката на Македонската филхармонија, Тина Иванова.

Пред се, сакам јавно да соопштам, дека ниту јас како директор на Филхармонија, ниту било кој вработен од Филхармонија, ја имаше информацијата дека новата национална установа ќе биде сместена во овој објект.

Договори, преговори, состаноци, биле тајна. Со нас, со колективот, со уметниците музичари, со раководителот и Управниот одбор ниту збор. Ниту информација, ниту прашање, ниту разговор, ниту бутур.

Да. Зградата е на државата и Филхармонијата исто. Ама не и музичарите, уметниците, ансамблот.

Информацијата за тоа, сите, вклучувајќи ме и мене како директор, ја дознавме на социјалните мрежи преку објава на некои портали.

Но во случајов не е важна непочитта спрема најекспонираната и најуспешна културна установа во државата која и Ковидот го протурка со фул програма.

Ниту пак овде и сега станува збор за суета. Непочитта не зборува за нас туку …

Станува збор за реалната ситуација и за можностите за евентуално взаемно функционирање.

Скоро целата институција, сите музички уметници, цела администрација и Управниот одбор, потпишаа петиција и објавија соопштенија до Владата, Министерството за култура и медиумите со аргументи зошто не би било добро Националниот оркестар за џез музика да функционира во зградата на Филхармонија, за што сите сте добро запознаени. Во истата таа објава сите едногласно позитивно ја поздравивме одлуката за формирање на Национален џез оркестар.

По оваа едногласна размисла на сите вработени во оваа институција, бевме повикани на состанок од страна на министерката за култура, неколкумина музичари од Филхармонија, јас како директорка и двајца претставници на ЗЏМ, од кои едниот е вработен во Македонската филхармонија повеќе од 20 години.

На состанокот, министерката за култура, откако и ги објаснивме причините и последиците од ова взаемно функционирање на два сосема различни оркестри, ни вети дека ќе го смени делот во одлуката за сместување на Националниот џез оркестар во домот на Филхармонијата.

Притоа, се договоривме, да не даваме изјави во медиуми до промената на Одлуката, да не се изјаснуваме на социјални мрежи по ова прашање, за јавноста да не биде погрешно информирана.

Но некои не се држеа до овој џентлменски договор кај министерката. Катадневно во јавноста пласираа невистини, дезинформираа, јавнаа на бранот на поддршката за институционализирање на ЗЏМ за што ние овде во Филхармонијата и со години се залагаме и со години ги поддржуваме и со години помагаме вклучително и јас лично.

Непријатно сме изненадени од некои наши пријатели, колеги и соработници за манипулирањето на јавноста и медиумите, рече Иванова.

 

Таа посочи дека имале исклучителна соработка ЗЏМ и безрезервна поддршка.

Јас, Тина Иванова, нека кажат претставниците на ЗЏМ, и од времето кога соработував со нив, од секогаш сум им ја давала мојата поддршка неизмерно и безрезервно. Ги ценам како уметници и знам дека во нивните редови има фантастични музичари. Бев на неколку состаноци за да преговарам да им се даде простор, за што имав позитивен одговор и за Домот на АРМ и за студијата М1 и М2 во МРТВ.

Сега, во овој случај, како директор на Филхармонијата, застанувам зад колективот, зад единствениот став на сите вработени. Не само поради солидарноста туку и поради нивниот  исправен став и реалната потреба Националната филхармонија, брендот на македонската култура, да не биде предмет на експерименти непримерни за ниту една филхармонија во светот.

Оваа „филхармониска генерација“ направивме уникатна и високо квалитетна програма, изведовме грандиозни дела, на сцената стапнаа фантастични диригенти и солисти. Имавме полни сали и задоволна публика. Така и ќе продолжиме.

Овие уметници се научени и на поинакви околности. Можеме да се вратиме и во Домот на АРМ, можеме и на отворено и тука сме со потврден квалитет. Пак ќе правиме концерти.

Сега директорка сум јас, министерката е сега министерка. Утре нема да бидеме на овие должности ниту јас ниту таа. Но овие луѓе овде, овие уметници, кои сега со право реагираат, и натаму ќе останат да се тоа без оглед на околностите. Но неприродно е да се прават обиди за создавање услови за едни на сметка на нарушени услови за други. Така се задира во успешноста и кај едните и кај другите.

И пак, никаде во светот во објект со планска намена за филхармонија не функционира џез ансамбл.

Еве, тука е дипломатскиот кор, прашајте ги каде е тоа случј. Никаде. И не случајно – никаде.

И повторувам, не отсега, од многу одамна сите застанавме на страната на ЗЏМ, секогаш ја имале нашата безрезервна и професионална и другарска поддршка. Патем, наспроти обидете за извртување на фактите во јавноста, секогаш им биле отворени филхармониските сцени за нивни концерти.

Но функционирање на два национални оркестри со сосема различна програмска и естетска концепција е неспоива состојба на што всушност реагира и целата Филхармонија, потенцираше Иванова.

 

Македонската филхармонија следната година одбележува 80 години постоење.

Националната филхармонија ја слави музиката. Наредната година колективот ќе го одбележи големиот јубилеј – 80 години од формирањето на Македонската филхармонија а утре е нашиот концерт „Благден“. Под палката на маестро Вања Николовски Ѓумар ќе биде изведено едно од најграндиозните дела во историјата на класичната музика, Петтата симфонија од Густав Малер. Концертот почнува во 20 часот. Сите сте добредојдени, заврши Иванова.

 

 

 

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.