Вечерва во црквата Св. Софија во Охрид, со почеток во 21:00 часот, ќе имате можност да уживате во британска вечер со настапот на пијанистот Бери Даглас.

Меѓународната кариера на Бери Даглас започнува по победата и закитувањето со златен медал на престижниот натпревар „Чајковски“ во Москва во 1986 година. Како уметнички директор на Камерата Ирска, единствен комплетно ирски ансамбл, како и на Фестивалот во Кланденбој тој продолжува да го слави своето ирско потекло, додека е постојано присутен на меѓународната музичка сцена. Последните неколку сезони настапува на турнеи низ В. Британија со Естонскиот национален симфониски оркестар, како и со Варшавската филхармонија и Националниот оркестар во Лил (Франција). Меѓу другите настапува со Лондонската филхармонија, Оркестрите во Санкт Петербург и Москва, со Рускиот национален оркестар, оркестрите во Ванкувер и Колорадо како и со оркестарот „Хале“ во Манчестер.

Како музичар со рецитали и камерен музичар Бери Даглас настапува низ целиот свет, во престижни сали како Ројал Алберт Хол, Барбикан и Вигмор Хол во Лондон, на фестивалот во Вербие, во Забранетиот град и во концертната сала во Пекинг, во Големиот театар во Шангај како и во други градови во Кина. Во минатото настапувал со Симфонискиот оркестар на Би-Би-Си, Симфонискиот оркестар на Сингапур и Берлин, Штатскапеле Хале, оркестрите во Синсинати, Сиетл, Мелбурн, Сиднеј, Кралската филхармонија во Ливерпул, филхармонијата во Хонг Конг и др.

Бери Даглас снима за издавачката куќа „Чандос“ и неодамна издаде комплет од 6 ЦД-а со комплетните дела за соло пијано на Јоханес Брамс, додека пак сега се фокусира на делата за пијано на Шуберт и Чајковски. Со оваа издавачка куќа, Даглас особено внимание обрнува на ирската фолк музика низ негови аранжмани работејќи со стари мелодии, но и со дела на современи композитори кои пишуваат во тој идиом.

Во 1999 година Бери Даглас го основа камерниот оркестар Камерата Ирска кој има за цел да ги обедини најталентираните млади музичари кои живеат во Северна Ирска и Република Ирска. Покрај што овој оркестар се стреми кон високо професионални изведби, меѓу останатото има за цел да промовира дијалог и соработка преку музичкото образование. Редовно настапуваат на турнеи низ целиот свет, а еден од најзначајните настапи е оној на фестивалот Би-Би-Си Промс, како и светската премиера на нова кантата заедно со Лондонскиот симфониски оркестар со цел промоција на изборот на Дери – Лондондери за град на културата во 2013 година.

Во 2021 година Бери Даглас е одликуван со Орден „Командир на Британската империја“ за заслуги во музиката и општеството. Ова одликување доаѓа по неговото прво големо признание во 2002 година кога е одликуван со орденот „Order of the British Empire (OBE) за неговата работа во областа на музиката.

 

Програма:

Ф. Шуберт: Четири импромптија D.899, оп. 90

П. И. Чајковски: Четири пиеси оп. 51

No. 5, Romance

No. 6, Valse Sentimentale

П. И. Чајковски: Ноктурно F-dur оп. 10 бр. 1

П. И. Чајковски: Од Осумнаесет пиеси оп. 72

Бр. 4 – Danse Charactéristique

–пауза-

М. Мусоргски: Слики од изложба

Promenade- Gnomus -The Old Castle-

Tuileries – Bydlo- The Ballet of the Chicks in their Shells-
Samuel Goldberg and Schmuyle–

The Marketplace at Limoges- Catacombs –

The Hut on Hen’s Legs –

The Great Gate of Kiev

Цена на билет: 500 денари.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.