Управата за извршување на санкциите во координација со КПД Идризово и со безбедносните органи во изминатиот период од два месеци го подигна степенот на безбедност, по добиени информации дека осудени лица планираат организирано бегство од установата, информираат од Управата за извршување на санкции.

Од Управата за извршување на санкциите посочуваат, дека во координација со КПД Идризово и со безбедносните органи, а врз основа на прибрани информации за безбедносната состојба во КПД Идризово, кои информации индицирале основано сомнение дека од страна на осудени лица се превземаат недозволени активности со кои би се создале услови за организирано бегство од установата, во изминатиот период од два месеци го подигна степенот на безбедност со цел да се дојде до подетални информации и да се провери нивната веродостојност.

Како резултат на овие активности, во кругот на Затвореното одделение е детектирано потенцијалното место од каде би можело осудените лица да ги реализираат ваквите планови и таму беше дополнително зајакнато обезбедувањето. Од причина што се работи за стари објекти од тврда градба кои се вон употреба, по спроведена постапка за јавна набавка избрана е фирма со соодветна дејност за рушење на наведените објекти. Откако е постигната согласност со Министерството за внатрешни работи со свои сили да обезбеди асистенција при реализацијата, денес на ден 21.03.2023 година во 07.00 часот е пристапено кон рушење на детектираните објекти, се вели во соопштението од Управата.

Воедно, како што посочуваат од Управата, се направени и повеќе ископи во кругот на одделението при што е пронајден подземен недовршен тунел во должина од околу 50-тина метри на потегот од објектите кои се уриваат кон оградниот ѕид.

По завршените планирани активности и реализираното рушење, во попладневните часови се на терен надлежните органи кои треба да ги истражат сите околности со цел да се утврдат сите факти до целосно расчистување на сите работи, се вели во соопштението.

Од Управата, исто тата, посочуваат дека ќе споделат дополнителни информации, по добивање на подетални податоци кои можат да се споделат со јавноста.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.