САД очекуваат изборите во Србија да се спроведат во согласност со правилата, да поминат во мирна атмосфера и да бидат фер, а од новата влада во Белград да ги продолжи разговорите за нормализација на односите со Приштина и патот кон европската интеграција, рече помошникот државен секретар на САД за Европа и Евроазија, Џејмс О’Брајан.

„ОБСЕ има голем број изборни мисии во Србија и внимателно ќе следи како се спроведуваат изборите“, рече О’Брајан одговарајќи на прашање на српскиот сервис Глас на Америка.
Зборувајќи за односите со Приштина изрази очекување од Белград „да се придржува до договорот што го направи за Косово“.

Тој посочи дека иднината на балканскиот регион е во единствениот европски пазар и членството во ЕУ.

Според него, за навистина да се приклучат на единствениот европски пазар, потребно е двете страни, како што наведе, „да ги решат разликите, да ги признаат границите и да се согласат да соработуваат“.

Зборувајќи за продолжувањето на преговорите меѓу Белград и Приштина за нормализација на односите, О’Брајан рече дека САД очекуваат намалување на тензиите на северот на Косово.

„Тоа е област каде што КФОР, силите на НАТО, се зајакнати. И европската мисија ЕУЛЕКС, исто така, е многу активна во последно време. Затоа, ниту една страна нема причина да предизвикува тензии таму, и таа област треба да остане мирна“, рече тој.

Тој смета дека една од мерките за намалување на тензиите е враќањето на Србите во институциите во Приштина и дека тогаш „би било голема работа за двете страни да се погрижат да го продолжат патот на нормализацијата што беше договорен минатиот март во Охрид“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.