Снимена е третата верзија на божикната песна „Вечниот бог“ со Антониа Гиговска, Ламбе Алабаковски и хорот од „Златно славејче“, информираа денеска од Здружението за возобновување на православни традиции „Бадникови поворки“.

Инструменти, вокали, хорче – мелодијата на најпопуларната божикна песна кај нас, со освежен аранжман, е комплетирана. За доживувањата во студио ќе раскажеме деновиве низ видео, а сега вредно продолжуваме со работа во Охрид, каде што започнува снимањето на спотот. Каква божикна приказна скроија генијалниот ум на нашиот режисер Дејан Пројковски и неговите соработници, ќе се види за само неколку дена, се наведува во соопштението.

Од Здруженитео информираат дека низ цела држава, во 50 градови и населени места, во тек се подготовките за Бадниковите поворки на радоста што на 6 јануари ќе чекорат низ улиците.

Во тек се редовни проби, но и работилници за изработка на ѕвездички, за ниедно дете да не остане без божикна ѕвезда. Децата во поворките ги симболизираат ангелите што го најавуваат Христовото Раѓање, а ѕвездичките што радосно ги веат над своите озарени лица, се водилка кон местото каде што се раѓа Богомладенецот. Симболично прикажано, кај нас тоа е патот до божикната пештера, каде е претставен целиот настан на Божик. Се поставуваат и божикните пештери и се подготвуваат малите божикни концерти, што ќе се одржат на плоштадите во поголемите градови во републиката, ка ко и хуманитарните акции што најдоцна до 5 јануари треба да снабдат што повеќе семејства со храна за празниците, се додава во соопштението.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.