Неофицијалната химна на Македонците како што ја нарекуваат „Заветна“ на легендарниот Пепи Бафтировски, Бојана Скендеровски не ја пее прв пат, но сега премиерно ќе ја чуете спакувана во ново руво. „Заветна“ е дел од проектот „Македонијо во срце те носиме“ и нејзиниот нов аранжман, како впрочем и на целиот проект, го потпишува маестро Николче Мицевски.

Инаку, „Заветна“ е една од оние песни во кои Бафтировски го опејуваше родниот крај. Создадена е пред повеќе од 30 години и песна која ја опејува вековната тага што се пренесува од поколение на поколение, но и вербата дека ќе дојдат подобри денови.

 „„Заветна“ е повеќе од песна, таа е химна… Во себе ја содржи сета вистина за Македонија, и како историјата да се повторува од времето кога била создадена пред 30 години денес нејзиното значење е уште поголемо… Сакам да изразам огромна благодарност до Миле и Георги Барбаровски кои ни оставија вакво музичко, брилијантно дело… Апелирам Пепи Бафтировски постхумно да добие награда за посебен придонес во музиката како национален уметник од државата. „Заветна“ е песната која ги обединува Македонците на секоја точка во светот, таа во исто време ти предизвикуваа милион различни емоции, те тера и да плачеш, и да бидеш силен, и горд на тоа што си. Прв пат ја отпеав во 2011 година во емисијата „Зајди, зајди“ и се сеќавам дека сега веќе покојниот Милан Завков ми рече: ‘Бојана браво, како се сети на песната, јас го снимав студискиот дел од аранжманот кога ја подготвуваме за Пепи…’ Инаку, сакам да се заблагодарам на целиот наш тим кој работи на овој проект, на мојот и наш продуцент Васко Скендеровски, на Николче кој направи чиста уметност со преработките, на техничката екипа која работи на аудио и видео делот од проектов, на моите колеги кои беа вистински професионалци, на тимот кој го работи ПР–делот и кој е задолжен сето ова да допре до публиката, и на сите медиуми кои ни даваат безрезервна поддршка…. И на крај огромна благодарност на целиот македонски народ што го сака „Македонијо во срце те носиме”!“, вели Бојана.

Видеото за „Заветна“ во изведба на Бојана Скендеровски е со потписот на Скендеровски продукција, која стои зад проектот „Македонијо во срце те носиме“, а во чии рамки се препеани 12 македонски легендарни песни, во изведба на 12 изведувачи, и од светот на забавната и од светот на народната музика. Меѓу изведувачите кои публиката допрва треба да ги слушне и види се и: Сузана Спасовска, ДНК, Андријана Јаневска и Зуица Лазова.

Уживајте во изведбата на Бојана и моќната „Заветна“ и, секако, очекувајте го стартот на концертниот караван кој под истото име „Македонијо во срце те носиме“ ќе гостува во неколку македонски градови – Да ја обоиме Македонија со најубавите звуци и да го зачуваме највредното – музичкиот аманет кој ни го оставиле генерациите пред нас.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.