И покрај штрајкот на филмските работници во Холивуд, што трае веќе месец и половина, Филмскиот фестивал во Венеција нема да остане без американските ѕвезди.

Најстариот филмски фестивал во светот се одржува од 30 август до 9 септември годинава, а потврдено е дека на црвениот тепих ќе прошетаат Адам Драјвер, Џесика Честејн, Кејлеб Ландри Џонс и Мадс Микелсен. Драјвер би требало да го промовира новиот филм на Мајкл Ман Ферари каде што тој ја игра главната улога – на италијанскиот возач и основач на автомобилскиот бренд Скудерија Ферари, легендарниот Енцо Ферари.

Најавено е и присуство на Кејли Спени и Џејкоб Елорди, кои ги глумат Присила и Елвис Присли во новиот филм „Присила“, како и самата Присила Присли.

Сите горенаведени филмови добија привремена дозвола од американското филмско здружение САГ-АФТРА бидејќи не се продуцирани од членови на АМПТП, против кои штрајкуваат. Забавната сцена во Венеција беше само малку погодена од овој штрајк, со само едно откажување на настанот на Кејт Бланшет.

Од режисерите, на настанот ќе се појават Дејвид Финчер, Софија Копола, Ава Дуверни, Мајкл Ман, Јоргос Лантимос и Вуди Ален, како и иконата од Хонг Конг – Тони Леунг, кому ќе му биде доделена Награда за животно дело.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.