Многу компании во Германија на своите вработени им исплаќаат божиќни бонуси (парични награди) веќе во ноември, а висината на овие бонуси варира од работодавач до работодавач.

Медиумите, пак, наведуваат дека просечниот божиќен бонус годинава е околу 2.800 евра.

Во категоријата највисоки божиќни бонуси се работниците во секторот за производство на нафта и гас, каде просечната награда е дури 5.733 евра, пишува магазинот „Феникс“ и додава дека вработените во секторот за преработка на минерални масла имаат нешто помал бонус ( 5.586 евра).

Во познати германски компании како Мерцедес, Бош и Порше, вработените исто така имаат право на божиќен бонус, со познати износи за Бош: божиќен бонус од 3.300 евра на стандардна максимална плата од 6.000 евра, а за Порше: оваа компанија додава 55 проценти на целосната 13-та плата.

Најмали „дополнителни суми во готовина“ им се исплаќаат на работниците кои работат преку агенции, а добиваат околу 380 евра. Во преработката на тутун бонусот е 564 евра.

Инаку, божиќниот бонус во Германија годинава ќе го добијат 85,8 отсто од вработените со колективни договори. Тие во просек добиваат 2.809 евра – 62 евра повеќе од лани, покажуваат податоците на германскиот завод за статистика.

Има големи разлики меѓу индустриите: во градежништвото, како и во финансиските и осигурителните даватели, повеќе од 95 отсто од вработените добиваат „стандарден божиќен бонус“. Во областите информации и комуникации и јавна администрација, одбрана, социјално осигурување – помалку од 70 проценти имаат право на овој бонус.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.