Ракетите ќе зборуваат сами за себе, рече Владимир Зеленски откако Вашингтон го овласти Киев да изврши напади длабоко на руска територија, користејќи проектили произведени од САД.

Во видео-обраќањето во неделата, тој рече дека е запознаен со извештаите во медиумите дека американскиот претседател во заминување Џозеф Бајден дозволил употреба на американски ракети со долг дострел за гранатирање цели на руска територија, но тој тоа ниту го потврди ниту демантираше.

Украинскиот лидер наведе дека на сојузниците им претставил „план за победа“, кој вклучувал „способност на украинската армија да користи оружје со долг дострел“.

„Денес многумина во медиумите велат дека добивме дозвола да преземеме соодветни дејствија. Но, нападите не се вршат со зборови. Вакви работи не се најавуваат. Ракетите ќе зборуваат сами за себе“, рече Зеленски, пренесе Ројтерс.

Претходно, „Њујорк тајмс“, повикувајќи се на неименувани претставници на американската администрација, објави дека американскиот претседател за прв пат ѝ дал дозвола на Украина да користи ракети со долг дострел за гаѓање цели длабоко во руската територија. Според весникот, шефот на Белата куќа го презел овој чекор откако се појавиле извештаи за „пристигнување на војници од Северна Кореја во областа Курск“.

Весникот „Фигаро“ објави дека и Франција и Велика Британија ѝ дозволиле на Украина да таргетира руска територија со ракети „Скалп“ и „Сторм сенка“.

Според Ројтерс, Украина би можела да ги изврши првите ракетни напади со долг дострел на руска територија во наредните денови. Според „Блумберг“, Киев ќе може да користи „ATACMS“ за да го таргетира регионот Курск.

По одлуката на Вашингтон, руските власти предупредија дека на светот му се заканува трета светска војна и дека Москва силно ќе одговори.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.