Светските цени на храната паднаа во март на најниско ниво за една и пол година, објави агенцијата на Обединетите нации ФАО, наведувајќи ги поевтините житарки и растителни масла благодарение на изобилната понуда и намалената побарувачка. Индексот на цените на кошничката основни прехранбени производи падна во март за 2,8 поени во однос на ревидираната вредност за февруари, на просечни 126,9 поени, што е најниска вредност од јули 2021 година.

Падот на индексот ја одразува изобилната понуда, пригушената побарувачка за увоз и продолжувањето на договорот што овозможува извоз на жито преку Црното Море, објаснуваат од ФАО.

Цените на житариците паднаа за 5,6 отсто во однос на февруари, откри агенцијата на ОН, издвојувајќи го падот на цените на пченицата за 7,1 отсто поради добриот род во Австралија, подобрените услови во ЕУ, обилните резерви од Русија и продолжувањето на извозот од Украина.

Падна и цената на пченката, за 4,6 отсто, поради прогнозите за рекордна жетва во Бразил. Цените на оризот паднаа за 3,2 отсто, што ФАО го објаснува со блиската жетва кај клучните извозници, вклучувајќи ги Индија, Виетнам и Тајланд.

Растителните масла поевтинија за 3,0 отсто во однос на февруари, а во однос на ланскиот март нивните цени се за 47,7 отсто пониски поради обилната понуда и пригушената побарувачка.

„Иако цените паднаа на светско ниво, тие сè уште се многу високи и продолжуваат да растат на домашните пазари, што претставува дополнителни предизвици за безбедноста на храната“, предупреди во соопштението главниот економист на ФАО, Максимо Тореро.

„Ова е особено точно за земјите во развој кои се нето увозници на храна, а ситуацијата се влошува со поевтинувањето на нивните валути во однос на американскиот долар или еврото и зголемениот должнички товар“, додаде Тореро. Цените на млекото и млечните производи во март се повисоки за 0,8 отсто отколку во февруари, поддржани од солидната побарувачка на путер.

Шеќерот порасна за 1,5 отсто, означувајќи го своето највисоко ниво од октомври 2016 година, поттикнат од загриженоста поради намаленото производство во Индија, Тајланд и Кина. Месото, исто така, поскапе благо, за 0,8 отсто, како одраз на повисоките домашни цени на говедското месо во САД поради очекуваната послаба понуда и повисоките цени на свинското месо во Европа пред празниците.

Во посебен извештај за понудата и побарувачката на пазарите на житни култури, ФАО малку ја зголеми својата проценка за светското производство на пченица во 2023 година на 786 милиони тони, што би било 1,3 отсто помалку од минатата година, но сепак блиску до рекордно ниво.

„Во Азија се очекува речиси рекордна засеана површина, додека северна Африка и јужна Европа се погодени од суша“, соопшти ФАО.

ФАО, исто така, малку ја зголеми проценката за светското производство на житни култури во 2022 година на 2,777 милијарди тони, што е само 1,2 отсто помалку од претходната година. Светско производство на ориз во сезоната 2022/2023 треба да достигне 516 милиони тони и да биде за 1,6 отсто помалку од рекордната 2021/2022 година.

Потрошувачка на житни култури во 2022/2023 година беше проценет на 2,779 милијарди тони, соопшти ФАО, што е намалување за 0,7 отсто во споредба со 2021/2022 година. Залихите на крајот од тековната сезона треба да бидат за 0,3 отсто пониски од почетокот и да се лизнат на 850 милиони тони.

Трговијата со жита треба да се намали за 2,7 отсто оваа сезона, на 469,2 милиони тони.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.