САД синоќа го претставија својот нов стратешки стелт бомбардер Б-21 Рајдер, авион што може да лета без екипаж и да изведува нуклеарни напади со долг дострел, како и да користи конвенционално оружје. Авионот беше претставен синоќа во Палмдејл, Калифорнија, на една од локациите на неговиот производител „Нортхорп Груман“.

Пентагон планира да купи најмалку 100 такви авиони по цена од речиси 700 милиони долари по авион.

– Б-21 Рајдер е првиот стратешки бомбардер по речиси повеќе од три децении, изјави американскиот министер за одбрана Лојд Остин.

Американската војска не открива многу информации за можностите на авионот Б-21, чии технички карактеристики се класифицирани.

– Новиот авион има дострел што не може да го достигне ниту еден друг бомбардер со долг дострел. Авионот е еден од најиздржливите бомбардери некогаш произведени, посочи Остин.

Како и повеќето неодамнешни модели на авиони на американската војска, како што се ловците Ф-22 и Ф-35, Б-21 ќе биде стелт.

– Дури и најнапредните системи за противвоздушна одбрана ќе имаат потешкотии да го детектираат Б-21 на небото, наведе Остин.

Првиот лет на Б-21 е закажан за 2023 година.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.