Рускиот претседател Владимир Путин на состанокот со највисоките функционери изјави дека Украина ја нападнала нуклеарната централа во регионот Курск за време на ноќниот напад.

„Непријателот се обиде да ја нападне нуклеарната централа ноќе. Ја информиравме Меѓународната агенција за атомска енергија“, рече тој.

За време на средбата, Путин не презентираше никакви докази за да ги поткрепи неговите тврдења. Електраната Курск е една од најголемите руски нуклеарни централи и обезбедува приближно половина од електричната енергија во регионот во јужна Русија. Властите на Курск ќе постават бетонски засолништа во Курчатов, каде што се наоѓа нуклеарната централа Курск, изјави Алексеј Смирнов, вршител на должноста гувернер на регионот.

Путин нареди и создавање единици за самоодбрана во пограничните региони на Русија. Гувернерот рече дека властите во регионот спровеле и обука за итна евакуација од пограничните области.

Владимир Путин има средба со високи руски претставници за украинската инвазија на Курск. „Ве собрав да разговараме за ситуацијата што моментално се развива во пограничните региони на Русија“, рече Путин на отворањето на состанокот.

Иако Москва досега се обидуваше да го намали значењето на ненадејниот упад на Украина на 6 август, таа евакуираше 133.190 луѓе од „опасната“ погранична област, рече вршителот на должноста регионален гувернер.

Украинскиот функционер рече дека овие тврдења на Путин се пропаганда и „чисти лаги“. „Русија сака да не обвини за нуклеарен тероризам. Тие можат сами да извршат ваква провокација и ќе се обидат да ја пренесат на меѓународно ниво“, рече Андриј Коваленко. Шефот на МААЕ Рафаел Гроси претходно изјави дека ќе ја посети централата во Курск поради безбедносни ризици.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.