Милијардерот и сопственик на социјалната мрежа Икс, Илон Маск денеска во Ерусалим ќе разговара со израелскиот претседател Исак Херцог за борбата против антисемитизмот на интернет, соопшти Кабинетот на шефот на израелската држава.

На средбата, што ќе се одржи попладне ќе учествуваат и претставници на семејствата на заложниците, кои ги држи Хамас.

Маск е во Ерусалим на четвртиот, последен ден од примирјето меѓу Израел и Хамас.

Минатата недела Белата куќа го обвини Маск дека „жалосно ја промовира антисемитска и расистичка омраза“ во една од неговите објави на неговата социјална мрежа Икс.

Маск, одговорајќи на објавата на еден корисник, кој напиша дека Евреите поттикнуваат „омраза против белците“ објави „Ја кажавте правата вистина“.

Белата куќа оцени дека со тоа Маск само ја повторува популарната теорија на заговор на бели националисти дека Евреите имаат таен план да ја поттикнат илегалната миграција во западните земји со цел да го поткопаат белото мнозинство.

Израелскиот премиер Бенјамин Нетанјаху во септември се сретна со Маск во Сан Франциско.

Се надевам дека ќе најдете капацитет да ставите крај на антисемитизмот (на мрежата Икс) или да го намалите колку што е можно во границите на слободата на говорот, му рекол Нетанјаху тогаш на Маск.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.