Закрепнувањето на премиерот Роберт Фицо, по обидот за убиство, ќе потрае „исклучително долго“, изјави денеска словачкиот вицепремиер Роберт Калињак, цитиран од француските медиуми.

Истовремено, болницата во која се лекува Фицо ја дефинира состојбата на премиерот како „задоволителна“.

Словачкиот премиер беше застрелан на 15 мај, по состанокот на владата во градот Хандлова, во централна Словачка. На премиерот му беа извршени две хируршки интервенции, кои траеја неколку часа, во болница во градот Банска Бистрица, каде тој се уште се наоѓа.

-Закрепнувањето на премиерот конечно е на вистинскиот пат. Закрепнувањето ќе биде исклучително долго бидејќи неговите повреди се многу сериозни, рече Калињак по состанокот на словачката Влада, истакнувајќи дека премиерот сега може да јаде.

Според Ерик Калињак, шеф на сите советници на премиерот, кој бил сведок на пукањето врз Фицо, премиерот ја избегнал смртта „за милиметри“.

Од болницата во Банка Бистрица денеска изјавија дека „лекувањето на премиерот продолжува според планираното и состојбата на пациентот е задоволителна“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.