Повеќе од 2.100 фалсификувани луксузни часовници во транзитна пратка за Македонија се запленети на аеродромот во Франкфурт, јави дописникот на МИА од Белград.

По запленувањето се појавија сомнежи за автентичноста на ваквите вредни предмети кои пристигнале со пратка од Хонг Конг.

Дванаесет пакети биле на пат кон Македонија, а биле транспортирани преку аеродромот во Германија.

Да беа оригинали, часовниците би вределе околу 176 милиони евра, се вели во соопштението на царинската служба, пишува „Дојче веле“.

Цариниците ги пронашле часовниците во октомври, но квалитетот на фалсификуваните часовници бил толку висок што царинската служба побарала мислење од 11 производители на луксузни часовници.

Често лажните часовници не можат да се препознаат на прв поглед, а единаесет изворни производители го потврдија сомнежот дека се работи за фалсификати, изјавила Кристи Штрас, портпаролка на царината на аеродромот во Франкфурт.

Таа додава дека лажните часовници веќе се уништени.

Минатата година главниот царински оддел во Франкфурт покрена постапки за дури 8.958 гранични заплени.

Царинските службеници запленија часовници, лекови, телефони, електроника, облека, обувки, но и производи за лична нега и играчки за деца.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.