И денеска како и сите изминати денови откако почнаа ненајавените протести, упатувам апел за практикување на мирен протест како дел од дијалогот, напиша министерот за внатрешни работи Оливер Спасовски на неговиот фејсбук профил.

Тој наведува дека дијалогот продолжува на денешните собраниски седници на кои е најавено обраќање на претседателката на Европската комисија, Урсула фон дер Лајен и на кои ќе се расправа за Информацијата за содржината на Предлог-преговарачката рамка за пристапните преговори на Република  Македонија со Европската Унија, предложена од страна на Претседателството на Франција на 30 јуни 2022 година.

Иако ниту вечерашниот, ниту протестите во изминативе неколку дена не беа уредно пријавени, наспроти неодговорноста на организаторите, пишува Спасовски, повикувам на свесност и одговорност во постапките. Никогаш поважни и порешавачки не биле европските вредности и социо-културни манири од сега – моментум кога демократските процеси мора да течат непречено.

Почитувани граѓани, Македонци, Албанци, Срби, Турци, Роми, Власи, сите граѓани на Република Македонија, Ве уверувам, македонската полиција останува на нивото на својата задача во заштитата на уставно загарантираното право на протест на граѓаните и, секако, на безбедноста на институциите и граѓаните, напиша Спасовски на Фејсбук.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.