Вицепремиерот задолжен за европски прашања Бојан Маричиќ, денеска заедно со премиерот Димитар Ковачевски и министерката за култура Бисера Костадиновска – Стојчевска, оствари средба со сојузната министерка за ЕУ и Устав на Република Австрија, Каролин Едштадлер, во рамки на работната посета во Австрија.

Како што информираат од СЕП, на средбата од страна на Едштадлер беше потврдена поддршката што во континуитет Република Австрија ја дава нa Македонија на европскиот пат и за спроведувањето на реформската агенда.

Австрија е земја која ја препознава вистинската и несомнена ориентација на Cеверна Македонија кон евроатлантските вредности и идеали, а наша задача останува во периодот кој следи да ја задржиме земјата на европскиот пат и забрзано да работиме на постигнување на оваа важна цел, која ќе придонесе за безбедноста и просперитетот на земјите од регионот во целина, рече вицепремиерот Маричиќ.

Владините претставници на средбата, како што е наведено во соопштението, го поделија ставот со сојузната министерка за ЕУ на Австрија дека Европската Унија е нецелосна додека земјите од Западен Балкан не бидат дел од неа.

Сојузната министерка за ЕУ и Устав на Република Австрија, Каролине Едштадлер ја дели со нас истата визија и цел: Cеверна Македонија и регионот треба да бидат дел од ЕУ час поскоро, пишува Маричиќ на својот Фејсбук-профил.

Ковачевски и Едштадлер, се вели во соопштението, го изразија взаемното задоволство од одличните билатерални односи меѓу двете земји кое се изразува и во недвосмислената поддршка на Австрија за евроинтегративниот процес на Македонија.

Во тој контекст од страна на соговорниците беше констатирано дека Македонија е кредибилен партнер на ЕУ, кој може успешно да придонесе во развојот на најважните европски политики и има капацитет заедно со ЕУ да делува и одговори на предизвиците со кои се соочува цела Европа.

На средбата беше разговарано и за продлабочување на соработката и унапредување на традиционално добрите односи помеѓу двете земји, во областа на културата, енергетиката и реформските активности поврзани со зелената агенда.

Австрија е меѓу нашите најважни партнери со која во последните две и пол децении сме сведоци на одлична соработка и постигнати резултати во спроведувањето на многу проекти во секторите, од огромно значење за развојот на земјата, како што се заштитата на животната средина, енергетската ефикасност и отворањето на нови работни места, соопштуваат од Секретаријатот за европски прашања.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.