Министерката за образование и наука, Весна Јаневска, во интервју за ТВ Телма истакна дека наставниците се клучни за успехот во образованието и дека сите промени во овој сектор ќе се спроведуваат во соработка со нив. Според неа, без оглед на квалитетот на наставните програми, без мотивирани и добро обучени наставници, нема да има значајни резултати.

Јаневска потенцираше дека наставниците треба да бидат активно вклучени во процесот на реформирање на образованието и дека сите промени треба да се спроведуваат со нивна поддршка и соработка.

– Ако нешто се обидете да им наметнете на наставниците, тоа не може да даде плод во образованието. Тие мора да имаат мотив и да се најде начин кој најмногу им одговара за да ги пренесуваат знаењата кон учениците – изјави министерката.

Во контекст на подобрување на условите за работа на наставниците, Јаневска најави дека ќе продолжат обуките за усовршување на нивните компетенции, а од следната година се очекува и поголемо процентуално зголемување на платите. Веќе овој месец, наставниците добија усогласување на платите согласно општиот колективен договор.

Министерката Јаневска со оваа изјава ја потврди посветеноста на Владата да го подобри образовниот систем преку зајакнување на улогата на наставниците. Со поголема поддршка и вклученост на наставниот кадар, се очекува да се постигнат значителни резултати во квалитетот на образованието и да се овозможи на учениците подобро образование.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.