Лидерот на ЗНАМ, Максим Димитриевски вели дека е погрешно коалицијата на Вреди да ја имитира ДУИ, бидејќи ДУИ, како што нагласи, е видена работа и минато. Тој нагласува дека Вреди е партнер на ВМРО-ДПМНЕ, која пак е партнер на ЗНАМ во власта. Димитриевски ќе почека да го слушне официјалниот став на МВР во врска со патувањето на претседателот на Собранието, Африм Гаши во Косово.

ЗНАМ е партнер со ВМРО-ДПМНЕ во оваа власт и во ниту еден момент ние немаме како политичка партија разговарано за каква било коалиција или заемна поддршка на централно ниво, но, сепак тие се партнер на нашиот партнер, го почитуваме тоа, но, ќе мора да направат корекција на самите себеси. Мислам дека е погрешно да ја имитираат ДУИ, бидејќи ДУИ е видена работа и минато. Треба да креираме нови политики за економски раст и развој на државата, бидејќи граѓаните веќе не се оптоварени, кој какво знаме ќе вее или кој е поголем заложник за исполнување на некои си наводни национални платформи и стратегии, туку едноставно, граѓаните сакаат да живеат во средена држава во која корупцијата ќе се намали, ќе се изгради систем и ќе се направи функционална држава, функционален систем во функција на граѓаните и на државите – одговори Димитриевски на новинарско прашање поврзано со инструментот балансер.

Димитриевски рече дека видел од социјалните медиуми за случајот со приватната посета на собранискиот спикер Африм Гаши со службени возила. Тој рече дека чека официјален одговор од надлежното Министерство, во делот на „уредување на режимот на движењето на ваков тип на високи функционери“.

Откако ќе го слушнам, ќе го дадам и својот став. Доколку возилото е користено за приватни потреби и семејни веселби, тоа е недозволиво. Во спротивно, ако вие вршите една таква висока функција во државата и ви следува обезбедување, извршено сѐ согласно протоколот, тогаш нема никакви пречки да се прави тоа. Но, сепак оставам на официјалните надлежни државни институции да се произнесат по случајот, а потоа и јас ќе го дадам своето видување – рече Димитриевски кој денеска учествува на форумска дебата – „Државните стратегии и предизвиците за одржлив развој на општините“, на факултетот „Хајделберг“ во Скопје.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.