Ќе постапувам согласно прописите од моментот кога ќе настапат моите надлежности, истакнува претседателот на Собранието Талат Џафери, кој утре треба да поднесе оставка и да биде мандатар на техничката влада што треба да биде избрана в недела.

Во гостување во поткасотот „Политиканти“ на „Слободен печат“ Џафери рече дека според роковникот в недела треба да се заврши целата постапка за техничка влада согласно Законот за Влада, согласно Уставот и Пржинскиот договор.

Информиран сум за она што ќе се случува затоа што сум дел од тие планирања за спроведување на техничката влада. Претседалот на собранието е координатор меѓу властите. Имавме соодветна координација со премиерот за да усогласиме термини, рокови, постапки кои што треба да се спроведат. Постапките ќе следат една по друга. Ќе постапувам согласно прописите од моментот кога ќе настапат моите надлежности, вели Џафери.

Прашан дали ќе му пречи доколку пратениците на ВМРО-ДПМНЕ не гласаат за новата техничка влада тој одговори дека по дефиниција пратеникот е слободен во волјата и во одлучувањето. Посочува дека нема да биде првпат да гласаат или да не гласаат.

Во два мандати сум избран претседател на Собранието. Не менувало ништо во односите наши тоа што гласале или не гласале. Ако се раководиме по таа логика тогаш би требало да ни пречи и фактот кој граѓанин како гласал на избори па да „ловиме во матно“, посочи Џафери.

Потсетува дека техничката влада е воспоставена со Договорот од Пржино и таму е дефинирано дека од изборите во 2016 и последователно кои и да се избори во иднина предвремени и редовни ќе се применува принципот привремена техничка влада за да се обезбеди прифатливост на изборниот процес, да биде усогласено учеството на сите во подготовката и спроведување на изборите.

Во тој контекст дилемата да или не понатаму е работа којашто треба да се реши и можело да се реши на почетокот на овој или наредниот мандат, вели Џафери.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.