Рускиот министер за надворешни работи Сергеј Лавров ноќеска пристигна во Македонија за да учествува на Министерскиот совет на ОБСЕ.

Авионот со кој рускиот министер за надворешни работи Сергеј Лавров допатува во Скопје на Министерскиот совет на ОБСЕ, прелетал преку воздушното пространство на Турција и на Грција, а не и на Бугарија, јавија руските медиуми. Менувањето на рутата за летот е поради одбивањето на бугарските власти да доволат прелет на авион во кој се наоѓа портпаролката на руското МНР, Марија Захарова. Летот траел повеќе од пет часа.

Во нотата од бугарското Министерство за надворешни работи, во која имале увид руски медиуми се вели: „Дозвола за учество на горенаведената средба во Скопје е дадена за министерот за надворешни работи на Руската Федерација Сергеј Лавров и неговата придружна делегација во согласност со белешката <…>. Дозволата не се однесува на директорот на одделот за информации и печат на руското Министерство за надворешни работи, Марија Захарова, која се појавува на списокот со санкции, во согласност со важечките закони на ЕУ“.

Захарова на Телеграм објави дека одлуката „…Не е само за глупост, туку опасната глупост на некој шегаџија во структурите на моќ во Бугарија“.

Факт е дека правилата за воздушниот сообраќај се регулирани со Чикашката конвенција за меѓународно цивилно воздухопловство од 1944 година. Таа пропишува територијата на една држава да се разбере како „копнени територии и соседни територијални води“. Воздушниот простор не е вклучен во терминот „територија“.

Во оваа смисла, ефектот од незаконските санкции на Европската Унија не може да се прошири на непрекинат лет на авион на лице на кое му е забранет влез на територијата на државата, пишува Захарова на Телеграм.

Според неа, за првпат во историјата, државни органи забраниле лице во авион, а не авион, бидејќи, според белешката од бугарското дипломатско одделение, на авионот на руското МНР му беше дозволено да прелета.

Рускиот министер за надворешни работи Сергеј Лавров ноќеска пристигна во Македонија за да учествува на Министерскиот совет на ОБСЕ.

На официјалниот твитер профил на руското МНР објавени се фотографии од пристигнувањето на Лавров на меѓународниот аеродром во Скопје на кои може да се види дека тој бил пречекан од рускиот амбасадор во земјава Сергеј Баздникин.

Лавров пристигна по завршувањето на неформалната вечера на министрите учесници на состанокот на ОБСЕ.

Учеството на шефот на руската дипломатија беше неизвесно поради меѓународните санкции против Русија по инвазијата врз Украина, но откако Бугарија соопшти дека ќе го отвори небото и ќе дозволи прелет на рускиот владин авион, а ЕУ кажа дека тоа не е кршење на санкциите, од Москва беше потврдено дека Лавров доаѓа во Скопје.

Поради доаѓањето на Лавров, учеството на состанокот на ОБСЕ во Скопје го откажаа министерот за надворешни работи на Украина Дмитро Кулеба, шефовите на дипломатиите на балтичките земји – Естонија, Летонија и Литванија, Маргус Цахна, Кришјанис Каринш и Габриелиус Ландсбергис, и министерот за надворешни работи на Полска Шимон Шинковски вел Сек.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.