Светски познатиот писател Милан Кундера почина на 95-годишна возраст, јави денеска чешката национална телевизија.

Негови најпознати дела се романите „Неподносливата леснотија на постоењето“, „Шега“,  „Книгата на смеата и заборавот“, „Уметноста на романот“, „Бесмртност“.

Кундера беше француски писател роден во Брно, Чешка во 1929 година. Заминал во егзил во Франција во 1975 година, а државјанство добил во 1981 година. Чешкото државјанство му беше одземено во 1979 година и вратено 40 години подоцна.

Романсиер, драматург, поет и есеист, Кундера беше највлијателниот чешки писател во втората половина од минатиот век. Откако поради критиките на советската инвазија врз Чехословачка беше во немилост на комунистичките власти, Кундера со сопругата во 1975 година замина во Франција и повеќе не се врати. Се гледаше себеси како француски писател и инсистираше дека неговото дело треба да се изучува како француска литература и да се класифицира како такво во книжарниците.

Пред „Кадифената револуција“ во 1989 година, комунистичкиот режим во Чехословачка ги забрани неговите книги. Водел повлечен живот и ретко зборувал со медиумите.

Кундера беше номиниран за Нобелова награда за литература, а добитник е на Ерусалимската награда во 1985 година, во 1987 година ја доби Австриската државна награда за европска литература и наградата „Хердер“ во 2000 година. Во 2021 година го доби „Златниот орден за заслуги“ од претседателот на Словенија.

Кундера беше добитник и на меѓународната книжевна награда „Табернакул“, која ја доделуваше истоимената издавачка куќа од Скопје. Тој и српскиот поет и писател Љубивоје Ршумовиќ беа први добитници на наградата „Табернакул“ во 2013 годдина. Кундера не дојде во Скопје, туку македонскиот писател Венко Андоновски му ја врачи во Париз.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.