Со цел да му помогне на своето петгодишно братче да се справи со стравот од темнината, младата авторка Маја Мишевска почнала да смислува приказни. Следувале раскази за справување со стравот од непознатото, од стекнување нови пријателства, тргнување на училиште, кои почнала да ги запишува… Така, приказните за добра ноќ прераснале во седум сликовници за сите дечиња.
Напишани од дете за дете (деца), секоја од седумте приказни на Мишевска се заокружува со некаква поентичка, дорасната за возраста на децата за која се наменети. Па, така, низ убав јазик, јасни ситуации и шарени илустрации, секое дете ќе се идентификува со јунакот исправен пред некоја пречка, навидум голема и непремостлива, зад која го чека силна порака. „Мравката Тони“, „Бумбарот Боби“, „Гасеницата Кики“, „Бувот Оли“, „Делфинот Дуле“, „Слонот Кире“ и „Коњчето Искра“ нè учат за упорноста, другарството и дружељубивоста, за храброста, љубезноста и фантазијата на најубав можен начин – нежно и со многу љубов. Серијалот сликовници на Мишевска се минијатурни бравури за предизвиците во растењето на секое дете.
Книгите објавени под едицијата „Железница на чувствата“, во рамките на импринтот „Либи“, дел од „Арс Ламина – публикации“, беа промовирани вчеравечер (6 јуни), во „Литература.мк“ во „Ист гејт мол“, во рамките на „Видик“ – новиот фестивал за литература и општа култура.

Настанот почна со работилница за деца, инспирирана од главните ликови во книгите на Мишевска.
Во весел и колоритен амбиент, како што се и самите сликовници, кои се илустрирани од познатиот илустратор Тхе Мичо, младата авторката откри како почнала да пишува, зошто ги избрала тие теми, какви пораки носат приказните, што сака да чита и кои се нејзините сегашни интереси.
– Првата приказна ја напишав кога имав десет години. Тогаш, мојот брат Стефан беше мал и се плашеше од темнината. Пробав преку приказната да раскажам дека темнината не е ништо страшно, дека никој не треба да се плаши од неа и така се роди приказната за бувот Оли. Му ја прочитав на брат ми на англиски јазик, бидејќи во тоа време тој сакаше да зборува на англиски. На некој начин, приказната ми дозволи да му го пренесам моето искуство и да го изградам мојот однос со него. Откако моите родители ја прочитаа, ми рекоа дека е добра детска приказна што носи позитивна порака. Оттука почна идејата да креирам и други приказни на англиски јазик. Секако, и темите беа поврзани за тоа што мојот брат допрва треба да го искуси и сакав преку секоја приказна да му дадам поддршка, поттик или охрабрување во ситуациите што го чекаа допрва. Стефан сега е тинејџер, како растевме и двајцата се пронајдовме во некои заеднички интереси, но приказните останаа силна алка меѓу нас двајцата… За приказните црпев инспирација и од најразлични моменти со моите пријатели на училиште и дома и од некои веќе прочитани книги. Карактерите ги замислував како животни, за да направам разлика помеѓу секоја приказна и со цел секој од нив да биде носечки лик со којшто можеме да се идентификуваме или да се поврземе во некоја ситуација или со некоја особина. Приказните се напишани така што имаат еден главен карактер што има цел на децата да им пренесе некаква порака. Сите овие пораки треба да им помогнат на децата полесно да го прифатат светот околу нив – рече Маја и нагласи дека ѝ е драго што книгите се прифатени одлично, од родителите на мали деца и од децата.

Промоторката на книгите, Бисера Бендевска,  истакна дека „тоа што го прави необичен случајот со овие седум сликовници е што Маја ги напишала кога и самата била десетгодишно дете и тоа е видливо во нив, во најубава смисла на зборот“.
-Нејзините приказни се едноставни, чисти, не морализираат, нарацијата се темели на детската перцепција на нештата, која е наивна и јасна. Во нејзините приказни нема страшни, лоши или опасни ситуации, преку чиешто надминување протагонистите би требало да се здобијат со некоја нова карактерна особина или да коригираат некоја своја слабост на личноста. Напротив, тука ликовите се испречени пред своите имагинарни стравови, во чијашто основа лежат стравот од непознатото и стравот од неуспех. Затоа Маја ги позиционира во пријателска средина, охрабрувачка, поддржувачка и поттикнувачка, што е многу зрела и искусна (воспитно-педагошка) постапка. И одлуката да вклучи животински, а не човечки ликови што ќе го носат дејството во приказните, исто така ни говори за сериозниот авторски пристап. Илустрациите на искусниот цртач Тхе Мичо совршено се надоврзуваат на вербалниот дел од целината. Изгледот на ликовите коинцидира со претставата што би си ја повикале читателите читајќи го текстот. Нивниот внатрешен свет, а и севкупната атмосфера во сликовниците, Тхе Мичо ја доловил и ја засилил со интензивни бои, со шаренило што побудува пријатни чувства и го оживува дејството – рече Бендевска.

Маја Мишевска е родена во Битола, каде што има завршено основно училиште, по што школувањето го продолжила во скопската гимназија „Орце Николов“. Последните две години од средното образование ги поминува на UWC „Адријатик“ во Дуино, Италија. Таму изучува двегодишна програма за IB-диплома. На високо (напредно) ниво ги учи предметите: економија, физика и математика, додека на стандардно ниво учи англиски јазик и литература, визуелна уметност и италијански. Како дел од програмата учествува на CAS-активности (Creativity, Activity, Service) во кои спаѓаат училишниот весник (каде што е лидер и дизајнер), танц, јога и еколошкиот тим. Моментално на „Браун“ во САД студира две насоки, компјутерска наука и родови студии. Предметите што ги слуша варираат од статистика и програмирање до литература околу репродуктивни права и италијанска историја на феминизам.

Фестивалот во организација на „Литература.мк“, што трае од 16 мај до 16 јуни 2024 година, ги обединува литературата, музиката, театарот, сликарството, филмот и дизајнот, давајќи значајна поддршка на авторите од сите области на културата. Со дваесетина настани, кои се одржуваат во книжарниците на „Литература.мк“ на улица „Македонија“, во „Дајмонд“, „Ист гејт“ и „Скопје сити мол“, на публиката ѝ нуди квалитетна содржина и непосреден контакт со најактуелните домашни и регионални автори и проекти од областа на културата.

Оваа недела ќе биде заокружена со концерт на една од најстарите блуз-групи во нашата држава, „The Wild Bunch“, што ќе се одржи на 8 јуни (сабота) со почеток во 21 часот во „Литература.мк“, „Дајмонд мол“. Бендот настапува во состав: Илина Лазаревска (вокал), Нино Недевски (гитара), Марјан Панговски (бас), Петар Лукиќ (клавијатури), Горан Попоски (тапани), Кирил Кузманов (саксофон) и Трајче Велков (труба). Понеделник (10 јуни) ќе биде резервиран за проекција на документарец и настап на диџеј Дарко Марковски. На 12 јуни во 20 часот ќе биде одиграна комедијата „Торонто експрес“. Претставата, со Александар Микиќ во главната улога, е работена според мотивите од книгата „Торонто експрес (Тибам штркот)“ на авторот Зоран Спасов-Ѕоф.

На 13 јуни (четврток), ќе се одржи поетско-музичкиот настан „Никола Маџиров и пријателите“, на кој ќе биде претставена големата книга „Шестарот на времето“, во издание на „Арс Ламина“. Во книгата, која е дел од едицијата „Македонски книжевни класици“, освен трите негови веќе култни поетски збирки без кои тешко може да се замисли поезијата на нашето време („Преместен камен“, „Некаде, никаде“ и „Заклучени во градот“), наградувани дома и во светот, изданието ексклузивно содржи и десет нови песни (досега необјавени во книга), првата песна што ја напишал Маџиров. Настанот ќе почне во 19 часот, со проекција на видеокомпилација со изведби на стихови од Маџиров, од страна на различни музичари и уметници ширум светот. По проекцијата, во 20 часот следува претставување на „Шестарот на времето“ и поетско читање. Книгата ќе ја претстави уредничката Оливера Ќорвезироска, по што ќе следува поетско читање проследено со музичка изведба. Стихови од Маџиров ќе интерпретираат познати имиња од повеќе области на културата, негови соработници и пријатели: Ѓоко Здравески, Добрила Грашеска, Симона Димковска, Николина Андова Шопова, Влада Урошевиќ, Александра Пешевска, Искра Гешоска, Ивана Јовановска, Зарина Првасевда, Елизабета Шелева, Александар Прокопиев, Дарко Лешоски, Дејвид Гир, Ѓорѓи Јолевски, Џон Илија Апелгрен со Гордан Спасовски (муз.), Гоце Смилевски, Ива Дамјановски, Мартин Манев, Јосип Коцев, Mојра и други. Во продолжение на вечерта ќе се одржи музички настап на триото во состав: Никола Бочваров, Дамир Имери и Гоце Стевковски, исто така инспириран од поезијата на Маџиров.

На 14 јуни (петок), во 21 часот, во „Литература.мк“, „Дајмонд мол“, ќе се одржи концертот „Диши љубов“. Групата „Шлиц“ (Schlitz), која ја предводи нашиот музички феномен Џијан Емин, ќе ја видиме во една поинаква светлина со сосема нов, автентичен и уникатен проект преку изведба на мешавина од арт рок и џез од мултимедијалниот проект „Диши љубов“, по текст на Тина Иванова и сценско-музичкиот перформанс „Улица“ создаден на текст од Славко Јаневски. Со овој настан ќе биде затворено првото издание на фестивалот „Видик“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.