Во кафе барот „Ликвид“ во Охрид синоќа беше промовирана книгата „Додека спиеш“ од македонската поетеса Биљана Стојановска, во издание на издавачка куќа: „Чудна шума“

Пред присутните за поезијата на Стојановска говореше Билјана Црвенковска, уредник на „Чудна шума“, а стихови интерпретираа: Ана Голејшка Џикова, Долорес Атанасова-Лори, Снежана Стојчевска и Елена Митреска.

Стојановска умее со природноста на Господинов, да напише стихови за празнење на цревата и тоа да биде поетично. Умее во песните да даде неочекуван пресврт или ефект на изненадување, но умее и од реалност незабележливо да нѐ внесе во бајка и да нѐ воодушеви со магичниот реализам. Да ни раскаже приказна за камионот со сладолед и за вкусовите на летото среде зима, но и да нѐ тресне од сивиот бетон и да нѐ врати во реалноста на болничките соби каде што луѓето се обидуваат да си го вратат достоинството и да си ја задржат главата на рамена, вели Снежана Стојчевска во рецензијата за книгата.

Биљана Стојановска е родена 1984 година. Има дипломирано на Филолошкиот факултет „Блаже Конески“ во Скопје, на отсекот за македонска книжевност и јужнословенски книжевности. Во 2015 година ја објави нејзината прва збирка поезија „Зборовите немаат значење“ во издание на „Антолог“. Добитник е на книжевната награда „Тодор Чаловски“ за 2017 година за книгата „Стан што се распаѓа“ (2018, „Галикул“). Нејзината поезија е преведена на англиски, германски, кинески, српски, полски, словенечки јазик, а застапена е и во повеќе списанија за литература и антологии.

Прв пат имам промоција надвор од Скопје и многу ми е драго дека тое е токму на едно од најубавите места во Охрид. Кога се договаравме за промоцијата прво реков, ама јас немам охридска публика, меѓутоа се покажа дека тоа не е вистина. Им благодарам на охриѓаните кои активно следат што се случува на современата книжевна сцена и на стружаните. Многу ми е драго што дојдовте и посакувам да уживате во интерпретацијата на мојата поезија од овие четири жени на кои посебно им се заблагодарувам бидејќи без нив ова немаше да се случи, рече Стојановска.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.