Денеска во Кинотека мастерклас со Елиф Ронген-Кајнакчи, куратор на неми филмови во Eye Filmmuseum

– КАКО ДА СЕ ИДЕНТИФИКУВА НЕМ ФИЛМ?

Кога филмската лента ќе пристигне во архивата, честопати не се знае за каков филм станува збор. Задачата на филмологот е да ги отвори ‘рѓосаните кутии и да ги прегледа и идентификува овие филмски ленти. Бидејќи филмската продукција подразбирала производство на многу копии и нивно испраќање насекаде низ светот, голема е веројатноста некој филм да се појави на некое неочекувано место.

И покрај ваквата практика на копирање и дуплирање, поголемиот дел од филмовите направени во периодот на немиот филм, од 1895 до 1930-тите, денес се сметаат за изгубени. Сепак, во секоја филмска архива има и бројни филмски ленти кои сè уште чекаат да бидат правилно идентификува­ни. Оваа презентација има за цел да ги објасни методите на идентификација, кои понекогаш се слични на детективската работа, преку реални примери на изгубени и пронајдени филмови од збирката на Eye Filmmuseum.

– МУЗИЧКИ ПАРТИТУРИ ЗА ПРИДРУЖБА НА НЕМИ ФИЛМОВИ НА ПЛАТФОРМАТА НА EYE FILMMUSEUM

– EYE FILM PLAYER

Во последниве години, Eye Filmmuseum соработуваше со различни музичари со цел да напишат и снимаат партитури за неми филмови кои се дел од нивната збирка, а кои потоа биле поставени на нивната стриминг-платформа Eye Film Player. Оваа презентација ќе го објасни бизнис моделот што го создале од кој произлегле различните соработки, но и тоа како се вршел изборот на музички дела. Презентацијата ќе прикаже и краток преглед на претстојните соработки кои Eye Filmmuseum веќе ги остварува.