Претседателот на ВМРО-ДПМНЕ Христијан Мицкоски објави нов податоци од серијата во која открива како се ограбува Македонија, граѓаните и ЕЛЕМ, денешно ЕСМ:

Каква е врската помеѓу ЕЛЕМ/ЕСМ, албанската државна енергетска компанија КЕШ, компанијата ЕТМТ Енерџи ДООЕЛ Скопје (омилен купец на вишоците на струја на ЕЛЕМ/ЕСМ) и компанијата од Тирана ЕНЕРТРЕЈД?

Заедничкиот именител што ги поврзува сите овие субјекти е корупција и штета на граѓаните на Македонија. Како?

Имено, ЕСМ/ЕЛЕМ распишува оглас за продажба на ноќни вишоци на струја за периодот од 30 август до 6 септември, од 2 до 7 часот во вкупна количина од 2000 MWh.

Албанската државна енергетска компанија КЕШ исто така распишува оглас но за набавка на струја за периодот од 29 август до 4 септември по сличен профил како тој на ЕЛЕМ/ЕСМ во вкупна количина од 2100 MWh.

Цената по која ноќни вишоци се продадени на компанијата ЕТМТ енерџи дооел Скопје е 337/MWh (слика 1), а цената по која албанската државна енергетска компанија КЕШ ја купува струјата по сличниот профил е 525,55 €/MWh.

Доколку во цената се вкалкулираат и меѓуграничните капацитети за август и септември од Македонија во Косово и од Косово за Албанија, кои во вкупна вредност за август изнесуваат 9,17 €/MWh, а во септември изнесуваат 15,65 €/MWh, тогаш вкупниот трошок за струјата купена во Македонија со вклучени меѓуграничните капацитети и банкарски трошоци (1%) за периодот од 30 август до 4 септември и профил од 2 до 6 часот, изнесуваат околу 350.000€, а истата таа струја во Албанија се продава за 525.550€. Разликата во цената на струјата купена во Македонија, пренесена во Албанија и продадена таму е околу 10.800.000 денари.

Дали компанијата купец на вишоците на ЕЛЕМ/ЕСМ, ЕТМТ Енерџи ДООЕЛ Скопје е поврзана со компанијата, ЕНЕРТРЕЈД од Тирана, Албанија која е најбрзорастечка компанија на пазарот на трговија и снабдување со струја во Албанија и со свои претставништва во регионот како и во Словенија и Унгарија?

Одговорот е ДА, преку лицето Артур Мицкај кој е сопственик на 50% од ЕНЕРТРЕЈД Албанија, но и на 50% од ЕТМТ Тирана, Албанија.

Заклучок: Македонија, граѓаните и ЕЛЕМ/ЕСМ за само 20 часа се оштетени за близу 10.800.000 денари и наместо вишоците да бидат понудени на стопанството кое плаќа според HUPX струја и грчевито се бори да опстане и да ги задржи работниците, парите се крадат и завршуваат во приватни џебови.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.