Со испитување на вештото лице Љупчо Постолов, дел од тимот на вештаци кои го изготвија сообраќајното супервештачење за Ласкарци, во Основен кривичен суд Скопје денеска продолжи судењето за автобуската несреќа во која загинаа 16 лица, а околу 30 беа повредени.

Покрај Постолов, во тимот вештаци кои го изготвија сообраќајното супервештачење се и вештаците Јакуп Мамути и Невзат Зеќири.

На денешното рочиште јавниот обвинител го испрашуваше вештакот околу начинот на кој се претставува во неговите трудови и лиценци. Потоа, тој се осврна на сообраќајната наука и наодите содржани во супервештачењето, фокусирајќи се на потенцијалното сопирање на автобусот, при што вештакот изјави дека може да се заклучи дека на третиот дел од патот, возачот на автобусот не кочел со интензивно сопирање и, како што рече, може да се додаде, воопшто не кочел во третиот дел.

Прашан дали кога покрај тоа што во третиот дел од сообраќајната несреќа има намалена брзина и помало изминато растојание смета дека има можност отпорите безмалку три пати да пораснат и да предизвикаат забавување без активна реакција на возачот, вештакот одговори дека може да се заклучи дека забавувањето од 1,2 метри во секунда на квадрат е минимално забавување на целата должина на изминатиот пат на автобусот и не може да стане збор за какво било сопирање или кочење од страна на возачот.

Во однос на тоа дали е возможно, без принудно сопирање возилото само од себе да забави, вештакот одговори да.

Супервештачењето што Судот го нарача во декември 2021 година беше одбиено од факултетите од државава, со објаснување дека нивните вешти лица веќе учествувале во претходното вештачење, или не се компетентни за истото. Откако факултетите одбија, предметот беше испратен во Бирото за судски вештачења, кое има можност да формира тим од лиценцирани вешти лица кои ќе направат супервештачење. Супервештачењето пристигна во Кривичен во декември. Потоа настапи формално отпочнување на процесот по кое се започна со сослушување на вештите лица кои го изготвија машинското супервештачење, а во моментов и на вештите лица кои го изготвија сообраќајното супервештачење.

Обвинети во случајот за несреќата кај Ласкарци, што се случи на 13 февруари 2019 се Дурмиш Белули, сопственик на компанијата „Дурмо турс“, одговорниот за транспорт во фирмата, Ремзи Мифтари и возачот на автобусот, Маноил Трифуновски, кои се товарат за сторени тешки дела против безбедноста на луѓето и имотот во сообраќајот. Додека, тројцата вработени во станицата за технички преглед, Игор Ѓорѓиевски, Горан Дуковски и Јане Боварски, се товарат за соучество во истото дело.

Судскиот процес започна во септември 2019 година и го води судијката Диана Груевска Илиевска, а застапник на обвинението е јавниот обвинител, Дарко Јакимовски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.