Украден електронски уред на граничниот премин Блаце. Првите сомнежи беа поврзани со ризикот од обиди за сајбер напади врз системот.

Од МВР за ТВ Алсат потврдуваат дека на контролниот терминал за патници со воз недостасува компјутерско куќиште. Но, тие негираат дека е можно да дојде до опасност од следење на информациите и до кражба на податоци, бидејќи, според полицијата, уредот не бил поврзан на софтверската мрежа на МВР. Во писмениот одговор велат дека компјутерот веќе подолго време не бил во функција.

Известен е Секторот за внатрешна контрола, криминалистичка истрага и професионални стандарди, кое ги презеде соодветните мерки. Доколку се утврдат пропусти во постапувањето на кој било полициски службеник, ќе се преземат мерки согласно Колективниот договор на МВР и за тоа ќе биде известено надлежното јавно обвинителство, известуваат од МВР.

Од МВР тврдат дека секој компјутерски систем може да биде цел на различни видови компјутерски напади. Од Секторот за компјутерски криминал и дигитална форензика набројуваат некои од причините кои водат до неовластен пристап до компјутерски систем.

Сакаме да напоменеме дека, според нашето искуство и според искуството на експертите од областа на компјутерската безбедност ширум светот, неовластен пристап до компјутерски систем се врши од луѓе кои ја користат ранливоста на системот каде лозинките се оставени непроменети долго време, користејќи едноставни и слични лозинки, додадаваат од МВР.

По зачестените напади врз државните институции кај нас и во регионот, Агенцијата за електронски комуникации апелира државата и компаниите да ја проценат безбедноста на нивните информациски системи. Тие споделија и листа на приоритетни активности.

Министерот Оливер Спасовски, секој ден на својот официјален профил на Фејсбук, како и на тој на МВР, објавува за ефикасни акции и успеси. Како што е познато, пред неколку месеци беше ограбен и магацин на МВР во Охрид.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.