Апелацискиот суд во Скопје ја преиначи првостепената пресуда од Основниот суд во Велес за Ангелче Николов, кој во декември минатата година на пешачки премин ја прегази 11-годишната Магдалена во центарот на Велес. Од изречените 18 години, Апелација му намали десет години за двете дела за кои тој се товареше – „тешки дела против безбедноста на луѓето“ и „неукажување помош на лице повредено во сообраќајна незгода“.

Оваа одлука на Апелациониот суд е финална, а Николов од притворското одделение, со денешната одлука, ќе биде упатен на издржување на затворската казна. Покрај затворска казна, Николов доби и пет годишна забрана за управување на моторно возило, која ќе биде ефективна од денот на неговото излегување од затвор.

28 годишниот велешанец Ангелче Николов на 17 декември минатата година, возејќи под дејство на алкохол и со неприлагодена брзина во строгиот центар на Велес на улицата„Борис Трајковски“, прегази мајка и нејзината 11 годишна ќерка. Од силината на ударот, малолетното девојче било исфрлено речиси до следниот пешачки премин на улицата и починало, а возачот Николов воопшто не запрел туку продолжил да вози со голема брзина. Неговиот мерцедес полицијата брзо го пронајде, а Николов самиот се пријави два дена по сообраќајната несреќа.


Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.