Српскиот претседател Александар Вучиќ денеска на панел дискусија во седиштето на ОН во Њујорк, каде што зборуваа жртвите и сведоците на војната во Босна и Херцеговина, ги повика сите членки на Генералното собрание на ОН да не ја усвојуваат нацрт-резолуцијата за Сребреница, јави дописникот на МИА од Белград.

Дали Македонија е меѓу нив? Министерката за надворешни работи на Германија вршела притисок врз некои земји да гласаат за геноцид во Сребреница

-Длабоко сум трогнат од сведочењата на сите Срби кои дојдоа овде да сведочат низ што поминале пред 30 години, рече Вучиќ на трибината на тема „Ние зборуваме затоа што тие не можат – гласови што треба да се слушнат“, организирана од постојаната мисија на Србија во ОН.

Тој нагласи дека вистината никогаш не е еднострана и дека жртвите тоа го потврдиле во пресрет на евентуалното усвојување на нацрт-резолуцијата за геноцидот во Сребреница.

Вучиќ истакна дека овие луѓе не се политичари, туку обични луѓе и дека сите ќе се чувствуваат многу лошо ако се донесе резолуцијата, бидејќи тие се жртви, а на челото ќе им се стави белег како да се дел од геоноциден народ.

-Србија никогаш не молчела, ние не молчевме за страшните настани во Сребреница, ние апсевме, ние приведовме и ги екстрадиравме сите што беа индивидуално одговорни за страшните злосторства што се случија во Сребреница, рече Вучиќ.

Претседателот на Србија додаде дека не може да уценува други земји како што тоа го прават некои од земјите коспонзори.

-Каков ќе биде резултатот ако утре ја усвоите оваа резолуција? Од едната страна ќе имате радост, а од друга страна ќе имате лутење, тага и гнев. Па, дали е тоа целта, праша Вучиќ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.