Белград не го признава Косово и не може да го екстрадира во Приштина лицето одговорно за организирање паравоена група на северот на Косово, изјави српскиот претседател Александар Вучиќ за Скај Њуз, негирајќи дека има улога во неодамнешното насилство. Во исто време косовскиот премиер изјави за истиот медиум дека Србија се обидела да предизвика војна.

Во интервјуто кое денеска го пренесоа белградските и косовските медиуми на српски јазик, Вучиќ рече дека „секогаш е полесно да се обвини Белград“ за тврдењата на Приштина дека Белград наводно планирал акција на паравоена група во селото Бањска на север во Косово.

„Кој ќе поверува дека тоа е всушност нешто различно, речиси никој“, рече Вучиќ, инсистирајќи дека и косовската полиција користи оружје произведено во Србија, но дека Србија не им го продавала.

Белград не може да го екстрадира во Приштина поранешниот потпретседател на Српската листа, Милан Радоичиќ, кој призна дека организирал паравоена група, бидејќи Белград не го признава Косово.

До неодамна, потпретседателот на Српската листа (СЛ), водечката партија на косовските Срби, Милан Радоичиќ, ја презеде одговорноста за организирање паравоена група на северот на Косово која се судри со косовската полиција, што заврши со четири жртви – полицаец и тројца Срби во село Бањска. По конфликтот, Радоичиќ поднесе оставка од функцијата во СЛ и негираше какво било учество на српската држава во нападот.

Осврнувајќи се на изјавата на Радоичиќ во предистражната постапка што против него ја покрена српското правосудство по конфликтот на северот на Косово, Вучиќ ја наведе неговата изјава дека „купил нешто во Србија, нешто во Хрватска, нешто во БиХ“.

Сега ќе провериме, рече Вучиќ.

Српскиот претседател потврдно одговори на прашањето дали Радоичиќ е негов близок сојузник, потсетувајќи дека тој бил потпретседател на Српската листа, која го поддржува официјален Белград. Сепак, Вучиќ инсистираше дека не може да каже дека Радочиќ е негов пријател.

Тој е обвинет. Тоа беше големо, огромно казнено дело“, нагласи Вучиќ, коментирајќи го обвинувањето на Приштина дека Радоичиќ е водач на „терористичка група“, додека српското правосудство го товари за неколку кривични дела поврзани со конфликтите на северот на Косово.

Српските правосудни органи го обвинуваат Радоичиќ дека наводно од јануари набавил оружје, муниција и експлозиви од Тузла, ги однел на територијата на Белград, а потоа ги складирал на Косово. Во меѓувреме, властите на БиХ негираа дека оружјето било купено во Тузла.

И косовскиот премиер Албин Курти даде интервју за Скај њуз и ги повтори обвинувањата дека Србија се обидела да предизвика војна, но не успеала во тоа.

Курти рече дека Србите, кои се судрија со косовската полиција во Бањска, се од групите Северна бригада и Цивилна заштита, а водач им е Милан Радоичиќ, кого го нарече „малиот Пригожин“.

Во интервјуто, косовскиот премиер повтори дека побарал од Белград да го екстрадира Радоичиќ во Приштина.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.