Српската републичка дирекција за имот го огласи претходното соопштение за датумот за распишување на тендерот за изработка на планска документација за седум гранични премини, меѓу кои е и граничниот премин Миратовац-Лојане со Македонија, јави дописникот на МИА од Белград.

Тендерот се планира да се распише на 9 мај, а како што соопшти бизнис порталот Екапија, станува збор за граничните премини Јаша Томиќ, Калуѓерово, Келебија, Ѓердап 1, Јабука, Љуба и Миратовац-Лојане.

Сите споменати гранични премини се веќе постоечки, па се претпоставува дека за нив ќе се направат проекти за реконструкција, освен за граничниот премин Миратовац-Лојане кој целосно треба да се изгради.

На крајот на 2019 година Србија и Македонија потпишаа договор за воспоставување нов заеднички граничен премин Миратовац-Лојане. Во февруари минатата година, српскиот претседател Александар Вучиќ изјави дека Србија прави се за да го отвори новиот граничен премин Миратовац-Лојане, дека има значителен интерес од Албанците кои живеат од другата страна на српската граница овој премин да се отвори, „но дека тоа е не е едноставна и лесна работа“.

– Не поради политички причини, туку затоа што треба секојдневно да плаќате луѓе кои ќе работат, тоа се наши зголемени трошоци, а ние бараме да ги намалиме трошоците, но не грижете се и таа работата ќе ја завршиме, кажа Вучиќ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.