Во Вишото јавно обвинителство во Заечар, Срѓан Јанковиќ, осомничен за убиството на двегодишната Данка Илиќ, денеска целосно го негирал извршувањето на делото, јавија српските медиуми.

Неговиот распит започна околу 10 часот и траел три часа, по што полициските службеници го извадиле осомничениот од обвинителството и го однеле со полициско возило.

Иако по два месеци избегнување да ја изнесе својата одбрана, сите очекуваа дека Јанковиќ решил да проговори за убиството, тој пред истражителите рекол дека не го убил девојчето, па дури и тврди дека никогаш не ја ни видел!

Адвокатот Живадин Богдановиќ, бранител на осомничениот, пред присутните новинари изјави дека во договор со неговиот клиент нема да го коментира денешното рочиште.

Јанковиќ по приведувањето се бранеше со молчење, односно го искористи законското право да не дава одбрана, додека другиот обвинет Дејан Драгиевиќ го призна убиството. Двајцата се во притвор, додека таткото на Дејан, осомничен дека му помагал на синот да го премести телото на девојчето, неодамна е пуштен од притвор. Притворен беше и братот на Дејан, кој почина во полиција, а кратко потоа почина и неговата мајка.

Двегодишната Данка Илиќ исчезна на 26 март во Бањско Поле кај Бор. Иако во притвор се двајца осомничени за нејзино убиство, сè уште не е пронајдено нејзиното тело.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.