Претседателката на Косово, Вјоса Османи денеска изјави дека дејствијата на косовската полиција против „нелегалните структури на криминалните групи на Вучиќ“ се легитимни и дека се во рамките на „исполнување на уставните должности и заштита на сите граѓани, без разлика“, пренесуваат српските агенции.

Коментирајќи го фактот дека САД ја осудиле интервенцијата на косовската полиција на северот на Косово, таа рече дека акциите биле во согласност со легислативата на Косово, повикувајќи се на уставот.

„Суверенитетот и територијалниот интегритет на Република Косово се неповредливи, неотуѓиви и неделиви и се заштитени со сите средства дефинирани со устав и закон. Дејствијата на косовската полиција против нелегалните структури на криминалните групи на Вучиќ се легитимни, во исполнувањето на нивните уставни должности и во заштитата на сите граѓани, без разлика. Одржливоста, долговечноста и успехот на овие акции зависат и од координацијата со сојузниците кои беа и останаа гаранти на нашиот суверенитет и независност. Заедно сме посилни!“, напиша таа на својот Твитер профил, пренесе Танјуг.

Шефот на УНМИК, Каролина Зијаде, побара да се преземат итни чекори за намалување на тензиите на северот на Косово.

Постапките на косовската полиција денеска ги осудија американскиот амбасадор во Приштина Џефри Ховениер и американскиот сенатор Крис Марфи.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.