Виолетовите медузи веќе се појавија на многу плажи во Грција.

Се сметаат за многу опасен вид, односно еден од најопасните видови медузи во Медитеранот, а нивниот раст на популацијата продолжува летово.

Според океанографот Харитон Хинтироглу, виолетовата медуза „има слабо движење и не може динамички да се пренесе од едно на друго место, па затоа во такви случаи тука се струите и ветерот кои ги пренесуваат“.

Ретки популации на виолетови медузи се појавија и во Атика и тоа на плажите во Мегара, Елефсина, Агиос Космас, Глифада, Анависос, Вулиагмени и Саронида.

Експертите велат дека зад популациското избивање на феноменот виновни се климатските промени и прекумерниот риболов на големи риби, бидејќи покрај желките, предатори на медузите се и сабјарката, туната и месечевата риба.

Погледнете ја картата со „црвените“ области

Виолетовите медузи се појавија во Јонското Море, но морските струи ги однесоа до Егејот, Термаикос и Халкидики, Пагаситикос и Споради, јужно од Евија, со што многумина ги избегнуваат грчките мориња.

Убодот на виолетовата медуза (Pelagia noctiluca) е болен поради невротоксинот што го содржи. Препознатлив е по четирите главни и осумте подолги и потенки пипала, заедно со „шапка“ со точки и виолетова внатрешност, додека пак истата има вообичаен дијаметар од 6-10 см.

Кога е млада неговата боја е портокалово-кафеава, а кога ќе порасне ја добива оваа интензивна виолетова боја.

Грчката опсерваторија за биодиверзитет предлага комплет за прва помош за плажата.

Како што забележува, добро е на плажа да го имаме следново за да може да се справиме со каснувањето од медуза:

Пластична картичка (дебитна, кредитна)
Пинцета
Чаша
Сода Бикарбона (сооднос 1:1 со морска вода)
– Антихистаминска пилула.
кортизонска крема како на пр. фуцикорт.
Чекорите за нега се:

Измијте се внимателно со морска вода, без да го триете местото на убодот.

Доколку можете, нанесете мешавина од морска вода и сода бикарбона (1: 1) две минути за да го спречите дополнителното лачење на отров од можните остатоци од клетките на пипалата оставени на кожата.

Користете пластична банкарска картичка или нешто слично (а не раце) за да ја отстраните смесата од сода бикарбона како и сите остатоци од кожата.

Држете мраз на убодот 5-15 минути. Мразот, па дури и ледениот безалкохолен пијалок, треба да биде во торба или друга обвивка, како крпа или маица.

Проверете дали болката се намалила, а доколку е потребно повторно ставете мраз уште 5-15 минути.

Доколку болката продолжува, консултирајте се со лекар или фармацевт за да ви препише лекови против болки или антиинфламаторни креми (како 3-4% лидокаин и хидрокортизон).

Местото на убодот завиткајте го со завои и никако не користете свежа вода, оцет, алкохол, амонијак.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.