Претседателот на Србија, Александар Вучиќ, ја разбира сериозноста на ситуацијата на северот на Косово, изјави специјалниот претставник на ЕУ за дијалог меѓу Белград и Приштина, Мирослав Лајчак, по денешната средба со него.

Денеска во Белград ја продолжив мисијата со средба со претседателот Вучиќ. Имавме отворен и искрен разговор за политичко решение кое ќе ги намали тензиите и ќе овозможи отстранување на барикадите (на северот на Косово). Тој ја разбира сериозноста на ситуацијата“, напиша Лајчак на Твитер.

Вучиќ и Лајчак прво разговарале приватно, а потоа им се придружил и специјалниот пратеник на американскиот Стејт департмент за Западен Балкан, Габриел Ескобар.

Вучиќ по средбите изјави дека имал „искрен и коректен“ разговор со Лајчак и Ескобар.

Лајчак и Ескобар денеска пристигнаа во Белград по дводневната посета на Приштина, во екот на зголемените тензии на северот на Косово, каде Србите од 10 декември ги блокираа патиштата поради апсењето на поранешниот припадник на косовската полиција Дејан Пантиќ.

Вучиќ најави дека на 15 декември ќе побара од мисијата КФОР одобрение за враќање на српските сили на Косово. Вчера во Приштина Ескобар изјави дека САД „категорично ја отфрлаат и воопшто не ја поддржуваат“ можноста за враќање на српските сили на територијата на Косово.

Највисоките претставници на Косово денеска во Приштина ја потпишаа апликацијата за членство во ЕУ и најавија дека утре ќе и ја предадат на Чешка, претседавач со Европската унија.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.