Легендарниот американски кошаркар и долгогодишен функционер на НБА лигата, како и лик чија фигура се наоѓа логото на лигата, Џери Вест, почина на 86-годишна возраст.

Вест беше еден од најдобрите кошаркари во почетоците на НБА, во 60-тите и 70-тите години од минатиот век, а целата своја кариера ја помина во Лос Анџелес лејкерс. Тој беше 14-кратен НБА ол-стар учесник, а по седум обиди и неуспешни финалиња конечно ја освои шампионската титула во 1972 година. Како тренер ги водеше Лејкерси во периодот од 1976 до 1979 година.

Неговата одлична игра на бековските позиции ја инспирираше лигата да ја стави неговата силуета како лого на НБА.

Како генерален директор и соработник во клупските раководства, Вест беше уште поуспешен – дури шестпати ја освои шампионската титула со Лејкерси – прво во ерата на Меџик Џонсон и Карим Абдул Џабар, а потоа и со Коби Брајант и Шекил О’Нил. Токму Вест е најзаслужниот за креирањето на тој тандем, со оглед на тоа што тој инсистираше да го донесе О’Нил од Орландо во Лос Анџелес.

Како дел од раководството на Голден Стејт вориорс беше соработник во создавањето на шампионската генерација во 2015 и 2017 година како вработен во клубот, а истиот тим уште два пати ја освојуваше титулата.

Неговиот последен ангажман беше во раководството на ЛА Клиперс, каде беше советник од 2017 година.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.