Користењето кокаин е на рекордно ниво. Според податоците на ОН, во 2021 година, околу 22 милиони луѓе ја користеле оваа дрога. Во однос на фреквенцијата на употреба, кокаинот е само втор по канабисот.

Во Европа кокаинот најмногу го консумираат германските граѓани.

Внесувањето кокаин во телото го доведува циркулаторниот систем до своите граници, што може да се спореди со нон-стоп маратонско трчање. Одвикнувањето е исто така голем физички и ментален товар. Сега истражувачите во Бразил работат на серум кој треба да ја поддржи терапијата за одвикнување, пишува DW.

Повеќето корисници шмркаат кокаин во прав – преку ноздрите. Алтернатива е пушењето со помош на луле. Активната супстанција стигнува до мозокот преку крвта. Таму предизвикува лачење на разни материи за пренос на информации, меѓу кои и допамин. Постои чувство на интензивна еуфорија.

Телото станува хиперактивно и иритирано. Срцето пумпа крв со полна сила, артериите се стеснуваат. Крвниот притисок и телесната температура се зголемуваат. Потребите како глад и жед стануваат ирелевантни. Во најлош случај, „патувањето“ може да заврши со конвулзии, кома или лицето да прекине да дише или срцето да престане да работи.

Вакцината против кокаин може да помогне во терапијата на оваа зависност. По вакцинацијата, во крвта се создаваат антитела. Тие се врзуваат за кокаин на таргетиран начин. Се создаваат формации кои поради својата големина не можат да поминат низ крвно-мозочната бариера. Ова ја спречува стимулацијата на мозокот, а со тоа и чувството што го носи конзумирањето на кокаин.

Ја спречува реакцијата на мозокот што предизвикува желба повторно да се земе дрогата. „Поради тоа, пациентот различно ја перцепира дрогата“, вели Фредерико Гарсија од Бразилскиот универзитет UFMG за Deutsche Welle. Неговиот истражувачки тим изврши експерименти врз стаорци.

Гарсија верува дека резултатите постигнати кај животните може да се постигнат и со луѓето. Тоа би била првата вакцина против кокаин што би се користела во терапија.

На вакви серуми работат и истражувачки тимови во САД. Во моментов нема клинички студии за луѓе, така што не е сигурно кога, ако воопшто, ќе се појави вакцина.

 

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.